1987年未來偶像爭霸戰準決賽

2月26日 伊利沙伯體育館 24名參賽者，淘汰一半。
譚祝銘 (即譚又銘)
最年輕的參賽者，只得14歲，唱"路黑山高錫人夜"(麥潔文)，進入總決賽兼有獎。後來改名譚又銘，簽JVC (Victor) 唱片公司出日文碟，但架味唔重，娘味濃，廣東歌代表作是軟硬至愛的"終於找到Love (笠)"。

孫富錦
參賽歌 : 別戀 (張學友)，進入總決賽兼有獎，後來做過下飛圖歌手，包括和飛圖小花林帆合唱，結果和林帆結埋婚。

尹麗玉
86年參加過新秀，屢敗屢戰，再參加未偶，唱"征服他" (梅艷芳)，進入總決賽都有個獎仔，結果簽了亞視做藝員，做過"開心主流派"和拍劇等。

曾航生
塊面好油，參賽唱"有誰共鳴" (張國榮)，進入總決賽但無獎，之後再參加新秀和其他比賽，在華納旗下出道，初時話係實力派，新人獎贏過黎明，淡出樂壇後做了搖擺天使/區議員梁安琪男友，又出道教歌曲碟，後來傳曾航生打梁安琪因而分手，近年在無線劇見到佢。

甄楚倩
一把梅腔唱"孤身走我路"，非常滄桑，其實只有17歲，好有實力，進入總決賽最後拿走冠軍大獎，瞬即獲得力捧，同年出碟。一參賽已改藝名甄楚倩，其實原名俞瑞兒，甄楚倩是結合甄妮、鍾楚紅、葉蒨文三人名字。

安德尊
技安樣，但冇咁難聽，唱"Stand Up" (張國榮)，入總決賽仲拿台風獎，之加盟亞視搞笑，憑兒童節目"德尊老師"為人熟悉。