嘩！曾航生梁安琪《再見亦是朋友》

上回講到，1991年的《現代愛情故事》引發了2009年的《情愛現代事故》，那麼1992年接續超娘合唱K歌熱潮的《再見亦是朋友》呢？今日在《蘋果日報》看到好消息，曾航生將於明後兩天舉行演唱會 (伙拍李國祥)，地點是荃灣大會堂，監製兼女友梁安琪自爆 : 「其實我係神秘嘉賓。」(唔知點解話明神秘，可以講出來；說了出來，仲係神秘) 她會取代鼻塞女歌手何婉盈，和曾航生合唱《再見亦是朋友》，唔使驚，唱歌還唱歌，他們沒有分手，仲好恩愛。


梁安琪不滿埋沒才華 曾航生、李國祥被迫出山
蘋果日報
2009年12月11日

現今樂壇青黃不接，新晉歌手懶音、走音乜都齊，所以實力派歌手開騷特別具吸引力。曾航生（Sam）和李國祥（KC）兩位低調歌手在演唱會監製梁安琪鼓勵下出山，明天（12日）起舉行兩場「雙子星演唱會」，回饋歌迷多年來的支持。

久未於報章雜誌露面的曾航生與李國祥合作舉行「雙子星演唱會」，兩人的首本金曲《再見亦是朋友》和《餘情未了》等，肯定令樂迷聽出耳油。曾航生早前與演唱會監製、女友梁安琪一同接受訪問，問到為何有與 KC合作的構思時說：「其實我自己好低調，但係見我哋嘅前輩都有咁多人欣賞，所以就出嚟做吓囉。」

安琪挑戰何婉盈

梁安琪續說：「佢真係好低調，我睇唔過眼，一個咁好嘅歌手應該出番嚟囉。」她又說：「其實我係神秘嘉賓，而家好辛苦練緊《再見亦是朋友》，壓力都幾大，但係要唔差過何婉盈唔難。」阿Sam則指壓力頗大，他說：「梗係大壓力啦，平時唱歌同上台做騷係兩回事，做騷要有要求，又要同live band夾，但係當玩吓啦，做兩場睇吓係點情況囉。」

李國祥慢工出碟

與曾航生相比，KC就輕鬆得多，他說：「最驚係啲衫唔靚，其實歌就揀好o架喇，係未正式排囉，不過大家都咁有經驗，個表演應該輕輕鬆鬆，有乜嘢問題一坐低傾兩句就解決晒啦。」正準備投入男裝內衣生意的他又說：「而家都係教吓學生，新碟一直有做緊，但係我同監製都係要求好高嘅人，大家都一早聲明唔好就寧願唔出住。」(完)


搖擺天使梁安琪都出過唱片，叫做《繼續流浪》，她不唱，也是樂迷一大損失。俞琤1988年入主商台後，夠膽與始皇帝對著幹的，只有烈女Angel一人。後來她從政，亦在坊間成為佳話，她2007年參選區議會，與陶君行在論壇上針鋒相對，被指大契上身，卿姐長毛毓民都要甘拜下風。

曾航生1991年度新人獎贏黎明 (港台&商台)，被喻為華納實力派vs寶記偶像派的勝利。退出後，他除了教人唱歌，亦經營星恆製作公司，有官方網站，他是站內點擊率最高的作曲人之一，對上一張唱片是他自作自唱的《音樂道德經》，2008年推出。

由以前到現在，都唔明點解華納簽鼻盟盟的何婉盈，她1991年港姐入五甲，但沒名銜，未幾就在TVB做主持，1992年出唱片，歌喉差無可差，最要命的是《再見亦是朋友》和《愛上你是我一生的錯》都hit，「再見亦是朋友」更成為城中常用語。

她1996年又唔知點解退出娛樂圈，重回校園讀港大，幾年後結婚，兩年後離婚，之後做過馬會公關，主持過賽馬節目。

曾航生 + 何婉盈- 再見亦是朋友 (1992)
作曲：嚕啦啦 (孫正明) 作詞 : 李郎
改編自台灣60年代校園歌《萍聚》，1987年李翊君錄成唱片，國粵語版都娘味重。


相同道理，許秋怡和老公王書麒經常登台時唱《現代愛情故事》。