荃灣唱片鋪...漢豐、南豐、荃豐

中學時代家住荃灣,荃灣曾經有很多唱片鋪,最大的是漢豐,在眾安街近楊屋道,我常常去那裡睇唱片。
以前的唱片鋪,格式大多是這樣的,一格格鐵架,黑膠碟垂直放,碟面向外,一張挨一張,最新出的放外面,通常分本地男歌手、女歌手、樂隊、精選雜錦幾格,外國碟另外擺。
牆上一行行架,盒帶「攝」入去,有時很難拿出來,或很難「攝」番入去。
最新推出的碟,有些鋪頭會將空的黑膠碟套掛在半空,頭頂對上高度,或者將碟套貼在收銀櫃台後面牆上,讓人一目了然。
再後期點,有banner或旗仔懸掛,是唱片公司的宣傳品。
憑記憶,曾經在荃灣出現的唱片鋪有這些﹕
01. 漢豐——最興盛時,有兩間漢豐,非常鄰近,都在眾安街,《新時代》有荃灣漢豐銷量榜,很有代表性,現已執笠,我在那裡買過幾輯《 Lover's Romance》盒帶。唱片市道最好時,漢豐隔籬左右開過幾間不同唱片鋪,形成一條唱片街,競爭幾激烈,要睇唱片可以行勻幾間格價。
02. 音符——英文Youth,是荃錦南豐三間唱片鋪之一,初時開在荃錦商場現萬寧位置,後來搬過幾次,去了入面鋪位,再搬去近福來村出口,再搬入內部,好似未執。 見過將《City Rhythm Part 1 Take Two》三吋CD雙色封面貼出來。
03. 南豐租碟鋪——電梯口對出,好窄,顧客揀碟差點屁股碰屁股,現變了手機店。 我還去過南豐一間上樓店,幫人黑膠過盒帶,可自選歌曲,逐首歌計數。
04. 南豐轉角店——現在的米蘭店隔籬,曾經好旺,有時迫都迫唔入,牆上貼了很多黑碟封套,最記得林憶蓮的《灰色》,現已執笠。
05. 在南豐手袋店旁,賣明星相,兼賣CD,短暫出現過。
06. 福來村永泰樓地下有間琴行,兼賣唱片,在荃官對面,lunch time可以去睇唱片,87年2月唱片大戰期間,鋪頭將林憶蓮、陳慧嫻、林珊珊的黑膠碟套貼晒出來,好熱鬧似的。現在冇了。
07. 路德圍曬相鋪,在橫街水渠邊,幾格黑膠碟,兼賣形式。
08. 眾安街荃灣城市中心,未建前是一排殘舊的石屋,要走落幾級石梯,有間殘殘的唱片店。
09. 精美——千色店地下,大規模鋪頭,有很多特價碟賣,盒帶好齊,好像已執。
10. 千色店後街晒相鋪,兼賣黑膠碟,我記得在那裡看過林憶蓮《Ready》大碟。執左啦。
11. 荃豐忘了名字——由一樓搬過上二樓,又執埋。記得見過好多張《夢了瘋了倦了》黑膠,其實那時黑膠時代已過去。
12. Honda?——在荃豐尾鋪,最記得門口個防盜器,好大個,已執。買過《回來愛的身邊》CD。
13. 音樂基地——荃豐地庫,要入會租碟,執了。租過達明《忘記他是她》CD Video,但沒有還。
14. 荃豐地庫出現過好幾間二手CD店,其中一間較大,兼賣錢幣。一樓入口處有間賣新唱片,見過劉美君現代CD boxset,自此之後未見過。
15. 和荃豐中心相鄰的華都中心,有間詭異唱片店,暗暗殘殘,有新舊CD賣。
16. 較後期了,愉景新城的CD Warehouse, 南豐中國國貨改裝成New Zone,有間新派CD鋪,和荃灣城市中心地下的CD鋪。全部都做唔住喇。
以前唱片業興旺,行唱片鋪也是一種娛樂,現在呢,荃灣還有唱片鋪嗎?請通知聲。

8 comments:

Sharon Chan said...

我都住荃灣架
你記唔記得荃豐在入d的商場,入面有間cd店係有個長髮哥哥看鋪架,間野o係d salon隔離,果間又叫咩名呢,我唔記得左..我中學時代(1995 ~ 2000 )always去果度買cd的, 現在佢執左lu,所以焗住去勁歌@citylandmark I..

Terence said...

Hi sharon,

我住荃灣的時期和你和不同,是1971年至1996年,以及2000年一年。我以前常去荃豐,以及你講的「入d的商場」(應該叫做華都商場)。記憶中有一間黑暗暗的CD鋪,面積不小但立立亂,有賣新舊CD的,我也幫襯過,不知是不是你說的那間,但我不記得店名。

Terence

stanley ho said...

長毛阿哥果間係我既天堂 我仲好記得間野
應該係商場一入去右手面第2間

想當年初中(96年?)~聽d國語歌(無印良品-光良拍品冠,小萱,到之后五月天,梁靜茹 etc.) 好似得佢有得賣~~佢d貨真係多到~諗得出都有咁滯 ~我既中學生涯就係佢陪我渡過....(我仲記得無印解散果隻碟,我一放學就撲去買,即刻拎返屋企聽. 諗起都好好笑)

佢既結業令我有一段時間好迷茫~覺得好可惜
之后就轉移信和啦

curtis said...

荃灣依家應該靜番三間CD舖, 一間o係千色店三樓(好耐之前千色店地下都有一間), 另外一間就係o係City Landmark同荃灣廣場既勁歌唱片。(唔知愉景仲有冇CD舖?)
我都記得南豐係有幾間CD舖, 有一間o係依家Peoples個位, 勁細, 另外仲有一間o係荃綿o個度, 仲有得借碟的, 同埋間舖頭都有買headphone。
漢豐執左, 真係好可惜, 我仲記得鄭伊健去過o個度搞簽名會。
Re: Sharon
我都記得華都個長髮哥哥呀, 佢好好人的, 我記得陳慧嫻97年一出隻"慧嫻港樂奇妙旅程", 我一放學就仆去買, o個時隻碟都係岩岩到舖頭, 佢即刻計個價賣比我。佢舖頭後面有張好大既陳慧嫻poster。唔知佢依家仲係咪賣CD呢?如果係既話幾遠我都去幫襯佢﹗

Anonymous said...

There were two record shops in 南豐商場 at around year of 1983 to 1984: 韻律店 and 音樂城. I brought my first record from 音樂城.
""眾安街荃灣城市中心,未建前是一排殘舊的石屋,要走落幾級石梯,有間殘殘的唱片店""
The name of this one was 百利

Anonymous said...

Sorry. should be "合利"

Anonymous said...

長髮哥哥嗰間冇記錯叫「富高唱片」,我以前都成日幫襯佢買外國indie碟同國語碟,執咗之後佢去旺角星際三樓開咗間二手黑膠舖,我都幫襯過一次。
荃灣八佰伴地庫都有一間「精美唱片」,大家又記唔記得呢?

chris said...

長髮哥哥而家去左信和3樓CD Boutique打工.