從頭認識 甄楚倩 (一)



有一些個人喜好,你不介意堂而皇之告訴別人,但有另一些秘密心水,你會收收埋埋自己把玩,因為讓人知道隨時招來訕笑。

我鍾意聽甄楚倩,因為知道她在CBS Sony時期的6張CD是罕有品,曾花時間金錢追尋儲齊 (另加一張新藝寶精選),我不知算不算一種guilty pleasure,尤其她後來淪落到要拍《滿清十大酷刑2之赤祼凌遲》,近年公眾形象又嚇人,拖住個小孩相依為命...儲甄楚倩的確有點怪,我並沒有周圍講有此嗜好。

甄楚倩的聲線屬風塵系,比滄桑略低一線,如果是一幢舊樓,應該不會列入受保護文物,但斑駁頹唐自有她的風韻,油麻地有不少這類街景。

甄楚倩 - 深夜港灣 (1988)
作曲 : Masashi Sada 作詞 : 潘偉源 編曲 : 杜自持
當然,什麼類型的歌者都有知音,當天星皇后逐一被拆去,有人聽她的代表作《深夜港灣》,別有一番滋味在心頭,製作了以下令人熱淚盈眶的MV,此情此景,即使關淑怡翻唱得再飄,都不及原唱應景。


甄楚倩 - 狠心女子 (憂怨混音版本) (1987)
作曲 : G. Moore 作詞 : 林夕 編曲 : 黃良昇
甄楚倩是1987年第二屆未來偶像爭霸戰冠軍,當時亞視急於建立自己的歌星班底,落力捧人,我記得她得獎未幾,便被送到日本受訓,同年推出第一張EP,只有16歲,一開始發展算順利,主打歌《狠心女子》有這個中國風混音。


甄楚倩 - 夢快車 (1987)
作曲 : Copyright Controlled 作詞 : 林振強 編曲 : 黃良昇
Yolinda出產甚多快歌,處女EP一慢一快作主打,但這首《夢快車》未開始走姣婆路線,不及後來的快歌反應強烈。


甄楚倩 - 小人物 (1987)
作曲 : 程雯 作詞 : 潘源良 編曲 : 鮑比達
亞視劇《香港情》主題曲,甄楚倩有份演出,另有未來偶像師兄張立基、亞姐黎燕珊和巨星魯振順。


甄楚倩 - 無伴的舞 (House Mix) (1988)
作曲 : Ritchie Cordell 作詞 : 吳旅榮 編曲 : 杜自持
第一張LP慢歌主打是《深夜港灣》,快歌主打《無伴的舞》remix由Alex Baboo (楊振龍) 和Patrick Delay主理,即是《灰色》remix EP的班底,跟得幾貼。


甄楚倩 - 無伴的舞 (1988)
作曲 : Ritchie Cordell 作詞 : 吳旅榮 編曲 : 杜自持
取自她1989年的音樂特輯《都巿蜃樓》,造型和《一分鐘都巿一分鐘戀愛》時期的憶蓮相似。


甄楚倩 - 難破船 (1988)
作曲 : 加藤登紀子 作詞 : 林振強 編曲 : 鮑比達
甄楚倩的低沉聲線是梅派,東瀛教母是中森明菜,甄楚倩拿原裝歌名來用,和梅艷芳的《無人願愛我》撞歌,同系聲線演繹同一旋律,一個滄桑,一個絕望,擊中不少怨婦心。


梅艷芳 - 無人願愛我 (1988)
作曲 : 加藤登紀子 作詞 : 陳少琪 編曲: 趙增熹


中森明菜 - 難破船


2007年是甄楚倩入行20年,有歌迷為她建立網站 :
http://www.yolindayan.com

甄楚倩第一張EP的4首歌,收錄在第一張大碟的CD之中,一碟13首歌好抵聽,這張CD日本製造。當年黑膠大碟得到白金銷量,yolindayan.com說她憑17歲年齡成為當時最年輕的白金歌手。

31 comments:

LBST said...

甄楚倩同張立基都是我喜歡的歌手。
不明白為何她過了新藝寶後聲勢變差,
她拍那個戲的決定,我想是有苦衷。很可惜。
昔日她在CBS的碟,絕對是好。
期待下一篇

d.p. said...

我也鍾意過"試過也算擁有", 同東方味極濃的"夢醒時份", 記得當時"夢"和憶蓮的"前塵接連登上流行榜前列席位, 其他唱片公司緊接著也為旗下歌手以小調/中式類型的歌曲作主打

Anonymous said...

我都鍾意阿倩,除咗怨歌之外,佢唱快歌都有兩度散手,個range都算闊, 最鍾意盛世戀同重頭開始, 林夕既詞真係中晒都市人既戀愛態度, 加上阿倩幽幽的聲線, 好灰~
92年的something special大碟, 收錄你真的可以忘記我嗎, 唯有在晚上才能lalalali同let's get smooth等正嘢, 聽咗咁多年, 依然係我最熱播大碟之一~
唔明佢當年點解突然冇得唱, 慘~

m said...

記得在舊雜誌中看過她的藝名來源是喜歡三位女星的名字: 甄妮/鍾楚紅/ ?

唔記得左~

m said...

btw, 有人話我知經典台重播中的"重案傳真", 最尾果幾集會有甄小姐份~

black lab said...

re m:
第三個名係xx倩我就唔記得,但係我記得yolinda原名叫俞瑞兒。

Fun said...

哇.. 原來你yolinda粉絲..

我記得佢參加未偶準決賽既時候係唱《孤身走我路》,一開聲嚇得我半死,得16歲但係把聲就似36歲,個種滄桑味似係經歷過好多不如意既事咁.. 後來決賽就唱《悟》,好好地一首勵志歌落響甄小姐手上都係變得非常“灰”..

Sony年代既幾張專輯都真係有好多好聽既歌,如果個陣佢係無記人應該會紅d添.. 亞視曾經響90年派過佢去東京音樂節,參賽歌係《早出晚歸》,排晒舞咁架..

後來佢轉去cinepoly同時簽埋無記,聲勢都唔錯,《一冷一熱》好hit,《戀愛傷身》仲係勁歌推介添..《妳真的可以忘記嗎》,又曾經響叱吒榜,連跳28級,狂升到亞軍..

偶爾響“實驗室”會見到yolinda,個樣就真係.. 有一次佢興起上台唱歌,把聲係無得再爛~~~ 唉~~

OGAKE said...

我記得佢後來改過個名叫"夏漫琪",無咩人知又令人摸不著頭腦。佢既碟我都有幾隻,但都係後期果D(我估阿Chi遲D都會寫),改篇《Baby Baby》既《一冷一熱》幾好聽架,也讓我有機會認識外地歌手,我記得佢著住件同麥當娜一樣既衫同兩個男Dancer跳住唱呢隻歌.....

OGAKE said...

叉開個話題:有無人寫下"未來偶像爭霸戰"?我只知甄楚倩、張立基、田蕊妮,落選既寶珮如、蔡濟文、袁鳳瑛,有無人補充下資料呀?

shangri_la said...

>m said...
>
>記得在舊雜誌中看過她的藝名來源是喜歡三
>位女星的名字: 甄妮/鍾楚紅/ ?
>
>唔記得左~

葉蒨文, although she didn't use the same '蒨'

Nakaaron said...

哇! 聽甄楚倩有乜咁奇呀,我都有佢Sony 精選和新藝寶一冷一熱同戀愛傷身兩隻CD 啦。你肯定用咗好多錢先bid到佢Sony D CD,Sony 時期就D 歌好,新藝寶時就歌藝有進步,佢唱一冷一熱吾差得過Amy Grant <Baby Baby> 架。自己就最喜歡佢首<試過也算擁有>。黃良昇作曲的.

Nakaaron said...

我有蔡濟文BMG時期精選CD,BMG時期D歌好好聽,雖然都係攺編多。聽聞佢係太子夜,幫屋企打埋生意,吾志在,所以DJ麻麻幫佢。其實睇DJ成日幫D乜歌手,都可能知道邊D歌手真係好性恪。

Anonymous said...

87年新人隨左劉美君,黃凱芹成績較突出之外,其餘要數的必然是甄楚倩了,因為她的第一張個人大碟,就已超越金唱片銷量,當時已一個在亞視的合約歌手有此成績,其實真是難能可貴! 阿倩隨左深夜港灣外,其實好歌仲有好多好多,本人較喜歡sony時代的霓虹玩偶,玻璃心,試過也試擁有,從來無真意,放心遠去吧....不過不明為何,阿倩隨左第一張大碟銷量較特出之外,其餘唱片銷量數字都是一般,這點實在有些少替他不值.

masahiko said...

87年新人隨左劉美君,黃凱芹成績較突出之外,其餘要數的必然是甄楚倩了,因為她的第一張個人大碟,就已超越金唱片銷量,當時已一個在亞視的合約歌手有此成績,其實真是難能可貴! 阿倩隨左深夜港灣外,其實好歌仲有好多好多,本人較喜歡sony時代的霓虹玩偶,玻璃心,試過也試擁有,從來無真意,放心遠去吧....不過不明為何,阿倩隨左第一張大碟銷量較特出之外,其餘唱片銷量數字都是一般,這點實在有些少替他不值.

Nakaaron said...

其實佢響Cinepoly時期係上緊位架,如果果時佢比心機再練好唱慢歌,再攪下D形象,係有機會上到位。點鬼知佢為咗愛情,合約都未完,連歌都吾唱,女人都係為咗愛情乜都吾要。

masahiko said...

其實可唔可以搵次介紹下林姍姍呢!

順風耳 said...

不知何故,從外形到歌曲,甄楚倩給我的感覺總是很滄桑的。
她一直是ATV女歌手的一姐(除左佢冇第個喇下話?唔通咩譚又銘都算咩!)差不多首首主打歌都有拍MV,如〔今天天氣呵呵呵〕,〔乖乖〕,〔深夜港灣〕,〔早出晚歸〕,〔夢醒時份〕etc,播放率都好高架!
我比較記得〔早出晚歸〕和〔夢醒時份〕,〔早出晚歸〕的意念其實到左而家廿一世紀仍然好work:鐘意玩咪玩囉,乜一定要日日做到冇停手甩頭甩髻先叫good同有意義架咩? 阿Yolinda唱<但慾望今晚衝破了關閉>果句好姣好好聽! 她在MV裏著的那套露腰top+熱褲跟Echo的〔風度〕MV是一樣的,不過區鳳蘭和李蕙敏可能怕醜唔敢露出腰部!^^
〔夢醒時份〕是古裝MV,一來配合歌曲的中國風,二來==>>我認為這才是main reason:從阿Yolinda的造型和服裝,明顯可見意念乃是來自當年非常hit的{聊齋艷談}! MV中段有個shot係阿Yolinda披散頭髮對住鏡頭略帶嬌羞曖昧地微笑.... 其實首歌幾sexy幾好聽係真既!

Oliver said...

甄楚倩,我小時侯喜歡到顛的一位歌手,不過現在講真係有點對Yoilinda唔住!

喜歡她的原因有太多了,也因為同情她當年在亞視出鏡十次不及在無線一次的處境所以曾經為她作出很多現在想起來很幼稚的行為。

記得在'乖乖'一曲推出時,商台的播放率是非常理想 (如果當年商台有叱吒十大的話今天天氣呵呵呵,夢醒時份及此曲一定好有機入選),但港台就慢熱。我當年一放學第一時間就是打去港台周慧敏christ wrong主持的節目點唱甄楚倩這首歌,試過一星期三日都有我的點唱, vivian都認得我呢,哈哈。

當年連一些我唔聽的星期日的節目都寫信去點(記住係寫信喎,幾花時間呢!),可惜《乖乖》始終上唔到冠軍。其他行為當然係一出唱片就係屋企開行佢, 務求由三樓到十三樓都聽呀倩的歌啦!皇天不負有心人, 呀倩在同年終於有一首2個電台冠軍歌"夢醒時份",大家都以為係呀倩開始上位的時侯!

其後因為要讀書,放少了時間留意yolinda的消息。她過了無線及轉了公司後我個人覺得除了第一隻碟新藝寶有放過心機去為呀倩宣傳外 ,其他都係好馬虎下!你睇連寶記系列的卡拉ok無咩yolinda既歌可唱,除了《一冷一熱》同《您真可以忘記我嗎?》(仲要係,二打六演出版!)外就知啦。

我個人分析甄楚倩的事業92年走下坡的其中一原因是因為當年係焦點放在四大天王的時期,流行榜的頭幾位大都由這四位霸佔,當時樂壇有冇數的歌手企不住腳而暗然離開。

另外,最令呀倩意外同致命的相信就是當年曾遠赴美國讀書的王靖文在92年突然回流,新藝寶的資源又回到呀菲身上, 更將(傳聞)原本打算給呀倩唱的「容易受傷的女人」給了王菲, 故事後來大家都知啦!王菲從此飛上支頭, 呀倩被打入冷宮! 我一早認為當年Yolinda 唔應該離開新力, 我想yolinda知王菲會回巢都未必會加入新藝寶!所以話在樂壇運氣比什麼都重要!
她無聲無息的推出最後一張精選碟時,我當年還不知這是yolinda在香港樂壇謝幕的時侯,還信她是跟那個姓謝的騎師真的愛得甜甜蜜蜜休息一排而巳! 自此因學業同工作我都沒有太關心yolinda的消息了。如果我當年醒少少, 肯發揮初中的積極精神為呀倩寫信游說唱片公司要好好培養呀倩,我想她都不會在22歲就離開樂壇咁可惜。

我更後悔的是沒有用任方法去阻止甄楚倩為區區6位數字而拍果套血腥色情電影。我真到現在都不明白為何呀倩要拍這套! 以呀倩的知名度,只要呀倩肯客串幾套普通電影,登台唱多幾場,都一定搵到呢個數啦!有說當年是王晶的甜言蜜語誘騙呀倩拍的,可惡!

遲些再講喜歡呀倩的原因同其他點滴。
好高興blog主為呀倩寫咁多文章, 真的很有心機呀,高興認識你呀^^

LeeKL said...

無論是'試過也算擁有'的低沉無力反抗聲線, '今天天氣呵呵呵'/'戀愛傷身'的姐姐妹妹站起來跳躍腔調又或'夢醒時份'的中古幽怨曲調,甄楚倩'都掌握到恰到好處,可惜香港人大部份喜歡比較清澈的那種聲底,有幾多個梅姐或小鳯姐這種帶風塵味歌手能走紅?

或者你看看cher, shania twain這類歌手在香港哪裏會有人香港人識呢?

Anonymous said...

我不是她的歌迷, 但我有齊她所出的cd, 不論廣東或國語齊CD版(徐了第一張EP沒有出CD版), 我的"今天天氣呵呵呵"CD是咭紙版, 不是盒版, 我看到你是盒版.
她的聲音當年很特別, 很多人說似梅艷芳, 但對一個當年只有16,7歲的小妮子, 真有
點成熟. 她是一個從亞視紅的手女歌手, 她第二張唱片真的很受歡迎, 唱片好賣, 歌HIT, 也是經典的一張專輯.不論在海灘, 街頭, 的士高等都有播她的歌.
版主好高興你做了甄楚倩的特輯, 我想你做多少少如寶佩如, 林姍姍, 梅愛芳, 等等.. 不過又有驚喜是, 你做了柏安妮的特輯, 我有她的專輯CD版.

chi said...

寶佩如比較難做,我只有她兩首MP3,認識很少;梅愛芳下載過唯一唱片的MP3,林珊珊只有一張精選,可以嘗試寫,遲些吧。

我那張《今天天氣呵呵呵》原本也是紙盒裝,但因是二手,被人改裝為膠盒裝,她的CD很難找,張張都找得有血有汗。

大寵愛 said...

甄楚倩-夢醒時份好好聽可否把mp3版本給我

Anonymous said...

唔知道除咗無伴的舞house Mix外,還有無再同Alex Baboo班底合作過呢。"妳真的可以忘記嗎"是嗎?

chi said...

對不起,遲了覆你,《你真的可以忘記我嗎?》的編曲是Patrick Delay/譚國政/楊振龍 (programming : 譚國政;all samples : Patrick Delay)

kit said...

多謝你的介紹. 你還可以寫一下關於蔡立(兒)嗎? 我對她的印象是, 她有一大堆極有西歌潛質的快歌, 不過因為她的唱腔, 才不致成為眾人笑柄, 當然獨身女郎(苦悶-full moon)例外. thanks again

Damien said...

萬分多謝chi提供編曲info.我一向無聽Y姐,但一定捧SL,FW等瑒.我記得你在另一個blog提過最留意搷詞人,我卻最留意編曲人.我首先在Youtube聽過,一聽到1,2,3Drop it!就feel到勁重V-wild味的signature sound.TVB的MV一向忘掉編曲人的功力,隻字不提.我就到google∕Yahoo查個明白,點知無料!直到今日又知道了!謝謝

laiwingnang said...

佢D 碟我都係差"霓虹玩偶"
想賣價既可以搵我.
其實我覺得佢新藝寶時期D 碟唔差, 隻SOMETHING SPECIAL我覺得幾好...只不過D 歌唔HIT.....
其實YOURS YOLINDA, SOMETHING SPECIAL D 歌都無咩點谷..
而且我覺得佢後期果D "性感"形像, 有D 姣既成份....佢新藝寶果D MV, 我見好多都摸身摸勢著得好性感, 香港人始終唔會比呢類形像可以上到一線..

BOBO said...

經我深入調查後, 發現當年90-94的報紙(連明報都是)都只大篇報導四大天王、葉玉卿、葉子薇、陳寶蓮、字母小姐等明星, 這正是「三級四大」年代, 女強手強如林憶蓮都被當透明,93年也退下香港火線去台灣;劉美君也曾公開呼籲大家要買女歌星唱片,這是女歌手的黑暗期,香港大部份女歌手被OUT出局, 直至95年三級片年代結束, 鄭秀文守得雲開終於升上一線!

Geelee said...

想請問網主小人物CD版長幾多?
係咪真係得youtube版分幾鐘?
可恨的復刻版冇頭版bonus的三首歌

chi said...

《小人物》CD版長4'18"

Geelee said...

不好意思 請問是否介意把頭版的3首bonus tracks send至 likemiriam@hotmail.com ?
不勝感激!