我的Sara 我的wow

李麗蕊 - 小妹妹日記 (1984)
作詞 : 林振強
Twins早期的學生妹路線,承襲自李麗蕊,雞仔聲,在班房寫紙仔溝男生,有情有景有故事,如出一轍。她初出道時唱歌O形嘴,上載片段的人稱為橡筋嘴,似唔似wow的嘴形?


新城大執位,wow了10年的李麗蕊年尾收大信封,分豬肉頒獎禮沒了她wow wow叫,缺了一點舊有特色,令人懷念。

李麗蕊做歌手時,未有勁爆,但我讀中學時,她的舊歌已引起過我的wow。













根據網上資料,李麗蕊1982年參加香港電台的城市民歌創作比賽,簽約土產天后宮永恆唱片公司,因當時永恆陰盛陽衰,網羅葉德嫻、張德蘭、薰妮、景黛音、沈金鈴、方麗盈等一班女將,阿蕊最young。我記得她早期是港台DJ,又在《歡樂今宵》的「激光旋律」、《勁歌金曲》等做主持,是音樂成份比較高的藝員。

李麗蕊 - 快將煩惱盡忘記 (1982)
作曲 / 作詞 : 黎明陽
這首才是李麗蕊的處女作,收錄在雜錦碟《香港電台城市民歌創作此賽82優勝作品選》,完全是一首中學生彈結他參加singing contest的民歌作品。


她頭三張大碟都是走學生妹路線,歌詞圍繞校園事物,note屎、紀念冊、畢業禮等經常出現。

李麗蕊 - 友誼萬歲 (1985)
原曲 : Auld Lang Syne 作詞 : 鄭國江


李麗蕊 - 第一次 (1985)
作詞 : 向雪懷














她出第三張唱片前,決定去英國讀書,宣佈告別樂壇,情形有點像89年的陳慧嫻,唱片主題也是講再見,製造了小小的依依不捨情懷,回此這張碟的歌比前兩張較hit。

李麗蕊 - How Are You My Friend (1985)
作詞 : 鄭國江


意想不到的是,她去了英國數月即回來,突然變身punk妹,超粗眉、白嘴唇、箭豬頭,嚇人一跳,我和同學還笑她,原來不是去英國讀大學,而是修讀化妝速成班。

一回來,就是勁爆的《激情十分》,wow!










李麗蕊 - 激情十分 (1986)
作詞 : 盧國沾
受林子祥的《十分十二吋》影響,以12吋大single形式推出的10分鐘跳舞medley大熱,先有周潤發玩parody的《十二分十分吋》,李麗蕊將英國/歐洲club scene最熱的dance beat改編成串燒,部份歌曲和林姍姍的《連鎖反應》撞歌。


李麗蕊 - Sara's Remix Medley (1986)
同一張single另一面,是將告別前的純情歌remix成跳舞版。


之後的follow-up大碟繼續做wet妹,首首MV都要落D拍。

李麗蕊 - Crazy Lady (1987)
作詞 : 小美
留意她的闊袍大袖、黑衫黑褲黑鞋,和同期的灰色林憶蓮、最後一夜劉美君相似。


李麗蕊 - Crazy Lady (Remix) (1987)
作詞 : 小美
有快歌,必有remix,這是當時必然配套。


李麗蕊 - 逆之女 (1987)
李麗蕊的歌勝在路線明顯,純情時首首白襪校服裙,一變就隻隻著到行去威。


李麗蕊 - 傷心天使 (1987)
作詞 : 向雪懷
中慢歌也是淪落街頭的霓虹玩偶,衰在把聲不夠甄楚倩滄桑。


連續一堆話勁唔勁、話潮唔潮的跳舞歌,李麗蕊徘徊三四線,最後一張出品,只是吊命的新歌+Remix EP,仲要慘在和氣勢凌厲的陳慧嫻撞歌。

李麗蕊 - Get Out (1988)
作詞 : 潘偉源
用百搭靚仔dancer郭富城襯,唔夠陳慧嫻配長髮謝天華咁經典。


陳慧嫻 - 不羈戀人 (1987)
作詞 : 簡寧
陳謝互摑啜核場面,是西MV的代表作。


以上兩首同曲不同詞都是半西歌,想聽李麗蕊的真正西歌,介紹你以下的《淑女》,唔係阿梅喎。

李麗蕊 - 淑女


李麗蕊的情史中有一個名叫發瘟,還浪漫到寫了首《我的Sara》暗送給她,所以他用菠蘿包追郭羨妮,算是低成本製作。

溫兆倫 - 我的Sara (1986)
作詞 : 溫兆倫


李麗蕊小檔案 :
‧1988年憑《學校風雲》得第六屆香港電影金像獎最佳女配角。
‧在亞視的《歷史也瘋狂》中自揭會考成績2A2B。
‧做勻各大電子傳媒,包括港台、新城、無線、亞視、有線。
‧唔知點解把聲愈wow愈爛,和陳淑蘭、梁思浩坐埋一枱。
‧現時主持aTV節目《a料》。
‧03年曾打算和前Beyond/浮世繪成員劉志遠結婚,後來計劃有變,現在呢?

由80年代到新城的李麗蕊帶給我不少歡樂,但很少人關心她的悲喜,以下專訪實屬罕見。

延伸閱讀

唔怕日日執屎 李麗蕊移居印度

壹週刊
2007-05-10

在印度加爾各答,德蘭修女建立的「仁愛之家」轄下的「垂死者之家」內,有不同國籍的人在照顧一班骨瘦如柴的垂死病人。

樓梯底暗角,有一身水身汗的香港藝人正眯埋眼,咬實牙關,用草紙去清理全身癱瘓病人剛剛新鮮滾熱辣製造出來的糞便。「好小兒科,我日日都做o架啦。」

印度是全球最貧窮的國家之一,唔少身受重傷以至全身潰爛的垂死病人都被遺棄到街上等死。在娛樂圈浮沉廿多年的李麗蕊,多年前因工作問題抑鬱,後經朋友開解,再隨朋友到當地做義工,眼見當地一個個奄奄一息的垂死病人,連購買紗布的錢都無,要靠拾回來的垃圾膠袋包傷口,傷口潰爛生蟲,情況慘不忍睹,才驚覺慘過自己十倍的,大有人在。

「傷口入面的蟲有成條意粉咁長,你見過未呀?我有車有樓有男朋友,但同絕大部分香港人一樣不快樂。去印度做義工,個人開朗番,窮有窮快活。」做了一個月義工的李麗蕊說計劃移居當地,尋找另一個天空。

加爾各答普通家庭平均月入約港幣千五元,表面上跟內地人平均月入差不多,但由於印度貧富太懸殊,唔少家庭負擔不起沉重的醫療費用,垂死病人沒錢醫病,便會被遺棄街上等死。

去年十一月,四十歲的阿蕊經朋友介紹,首次踏足印度加爾各答,並在德蘭修女建立、專門接收垂死病人的「垂死者之家」做義工。上月她再度出發到當地,在印度四月份卅八度氣溫下,阿蕊幫病人抹身、清理大小便、洗傷口及餵藥。

落手落腳執屎執尿,她已駕輕就熟,唯一難倒她的,是每日咬實牙關,細心地幫病人清潔已經潰爛的傷口。「窮人屋企都無防火設備,所以呢度特別多嚴重燒傷的病人。好多時我們接收他們時,傷口已經嚴重潰爛,入面仲有好多條蟲,有些有意粉咁長。他們一邊食飯,我們就一邊幫佢『除蟲』,日日都係咁。」

執屎,或於潰爛傷口「除蟲」未算恐怖,更可怕的是有時要替病人剪去已壞死的手指。手起刀落,一隻已壞死發黑的手指「卜」一聲跌到地上。「神經死晒,剪走了病人都無感覺。」一名跟阿蕊共事的義工說。

眼見全身癱瘓婆婆年老多病,李麗蕊心感難受,因此對她特別照顧,不單每天親自餵她進食,亦不介意幫她執屎執尿。

在平均攝氏高達三十八度的印度,李麗蕊餐餐同當地義工在悶熱的地方食飯,生活艱辛卻心靈滿足。

為了對人生更有體驗,李麗蕊甘願放低香港所擁有的豐富物質,到街頭食粟米,一樣滋味。

「垂死者之家」住了約一百名孤苦無依的病人,來自全球的義工日夜輪流照顧垂死的流浪者,讓他們重拾尊嚴。

有錢抑鬱

事出必有因,阿蕊之所以兩度到當地當義工,全因她在香港生活得不快樂。

阿蕊八二年入行,跟李麗珍、袁潔瑩等同期出道,曾參與電影《開心樂園》及劇集《誓不低頭》演出。其後加入電視台做「歡樂今宵」主持,由於大癲大肺動作表情多多,傻大姐形象深入民心,九七年加入新城當DJ,一做十年。

在熒光幕是搞笑能手的她,永遠笑臉迎人,背後卻原來一直受情緒問題困擾,心情經常處於低點。「我有車有樓有男朋友,但同絕大部分香港人一樣不快樂。物質上滿足並不能紓解我心中不安。」

移民唔撈

永無止境的慾望令阿蕊的壓力越來越大,最後變得越來越唔開心。「當我搵到一百萬時,又想追求三百萬,永無止境追求落去,反而令自己更加唔開心。我開始問自己人生究竟需要咩?後來我看了好多不同的心靈書籍,改變了我的人生觀,開始做有意義的事,例如做義工。見到唔同國籍、背景、信仰的人都放低自己一切,走去呢個咁貧窮落後的地方照顧垂死病人,真係好感動,好想學他們長住當地。」

去年年尾,阿蕊由印度當義工回港向新城請辭,但公司一直挽留。「我其實已經儲了一筆錢,夠我在當地住一段長時間。我連樓都睇埋,諗住買個單位長住。不過一切都係初步諗法,因為有好多事要考慮,而家香港有好多東西未搞掂,還在計劃中。」

滿街乞丐

印度是全球最貧窮的國家之一,有近八成人口每天生活費少於2美元(15.6港元)。在大城市孟買,便有過半人口(770萬)住在貧民窟裏,當地乞丐人數高達30萬。為幫助街頭流浪者,不少人遠赴由德蘭修女所建立的「仁愛之家」(Missionaries of Charity)當義工。

要到當地做義工並沒任何資格限制,只須在印度駐港領事館申請有關簽證,然後從泰國或孟加拉轉機到加爾各答,再到位於A.J.C. Road的「仁愛之家」總部登記便可。機構負責人每逢一、三、五會講解義工的服務範圍,如遊客只想參觀則毋須事前登記。

24 comments:

Anonymous said...

李麗蕊所謂既hit歌,其實都係一大批慳水慳力之作,皆因全部都係改編歌.仲要係原裝版都已經聽到滾瓜爛熟佢至攞黎改,(印象中好似無一首本地創作係hit過),最恐怖就係所有編曲都抄足原曲,而家聽番感覺好似是但搵一班人係酒廊彈完就算咁!全部毫無誠意之作!

其實李麗蕊都有好多"西"歌, 我會首選"黑教徒"(原唱係中森明菜),聽完之後,簡直令我想掉了那隻cd!

Anonymous said...

當年自己都幾ok李麗蕊ga, 由佢既小妹妹日記到Crazy Lady都有買佢d碟. 當年佢激情十分個look我都buy ga, 年紀小容易接受新事物, 現在當然"Da MEI" la.

李麗蕊都幾鐘意改Akina d 歌唱, 如戀愛熱線(禁区), 蛻變 (Second Love), 黑教徒 (AMISH 清教徒), 可惜唱唔紅佢.

我自己就幾鐘意佢既"蛻變", "第一次", "是你", "失戀記號" 等呢幾首, 其實佢d歌都唔係好西姐haha...

Anonymous said...

佢都唔係無進步過,當年佢唱一縷情就好
像有點開竅,無以前咁雞仔,
另外改編自柏原芳惠大熱作"儘管是春天"
的"已愛上你"我都常聽,
她真係好多歌都係日本當年大熱偶像歌改
編,不過編曲又確係簡陋過原裝好多下

shangri_la said...

> 李麗蕊所謂既hit歌,其實都係一大批慳水慳力
> 之作,皆因全部都係改編歌.仲要係原裝版都已
> 經聽到滾瓜爛熟佢至攞黎改

That is generally true, except her first hit 小妹妹日記 was a cover of わたしの青い鳥 (我是藍色小鳥), a song by 櫻田淳子 that won her best new artist award in 1973. By the time 小妹妹日記 came out in 1984, I doubt many people remember わたしの青い鳥, if they have heard of the song before at all.

> 印象中好似無一首本地創作係hit過

If only the covers turn out to be hits and the original doesn't, then you can't possibly blame the record company for covering. If anything, the fault lied in the public that preferred old hashed over original material.

Speaking of Sara's cover songs, I believe her cover of Nakamori Akina's 禁區, 戀愛熱線, was originally to be included in her second album 戀曲集. However, Leslie Cheung was also covering 禁區 into 第一次 in his upcoming album 為妳鍾情. (BTW, 戀曲集 happened to have a song named 第一次 as well, coincidence?) Due to copyright issue, Capital Artists had filed a motion to have 永恆 clear out their legal right before they could release 戀愛熱線. It was considered really ruthless on Captial Artists' part because they filed the motion AFTER 戀曲集 was released and 永恆 had to recall all existing copies. So if you have a copy of 戀曲集 that has 戀愛熱線 in it, it probably is a collection item.

Ogake said...

Crazy Lady個MV好搞笑,做咩一開始好似陳敏儀扮盲妹飲醉酒"中"落樓梯咁,中段又扮彈電子結他,要我的命~~
陳慧嫻不羈戀人的MV中,我覺得陳謝互摑不及那些dancer個頭fing黎fing去咁嚇人~哈哈~

Agnes Tse said...

李麗蕊把DJ聲我都幾唔鍾意,太嘈嘈閉,好似患上過度活躍症咁~(尤其新城安排佢夥拍洪朝豐)

當年李麗蕊加入"歡樂今宵",同江欣燕、程嵐(個名有錯請指正)演三姊妹趣劇,索性捧佢地做"三朵金花",勁歌熱舞,只限於"歡樂今宵"內.

??? said...

最記得李小姐扮亞梅唱"亂畫紅唇", 笑鬼死!

Anonymous said...

《激情十分》個妝好勁

另外篇訪問以前看過,好有印象,好深刻。 其實點解咁多人唔中意佢??

Anonymous said...

小妹妹年代嘅李麗蕊,成個人看來圓碌碌、脹卜卜。現在重溫佢MV內嘅樣子,感覺都幾得意、好笑的。佢响永恆時期真係好鍾意改編日語歌,我最有印象算是蹦蹦跳嘅《Forever》、同慢歌《蛻變》。

佢去完英國打個「白鴿轉」返港後,忽然變身做英倫punk妹,造型的確令人眼前一驚。不過,《Crazy Lady》我本人覺得OK、幾好聽的。佢當時打扮上雖然有點英倫氣息,但音樂選擇依然喜歡向東洋取經喎。《Crazy Lady》原曲是河合奈保子85年的單曲《Through The Window》,河合當年搵咗鬼佬音樂班底撐場,幫佢作曲同製作過一張唱片,佢仲親自飛埋去L.A.錄音架。

Anonymous said...

   
   
>>>當年李麗蕊加入"歡樂今宵",同江欣燕、程嵐(個名有錯請指正)演三姊妹趣劇,索性捧佢地做"三朵金花",勁歌熱舞,只限於"歡樂今宵"內.
 
Yeah,我記得呢段歷史!我記得唔知好似每個星期都唱一首歌,跳哂舞咁既!佢地三個有次唱劉美君〔一見鐘情〕,襯哂成set 綠色碎花 low cut + 短裙仔,懶係勁咁,好笑囉!
p.s. 佢地係咪嘴的
  
果個應該係叫蔣嵐,好似話唔知邊年的新秀,拍過下電視劇咁既(多數係扮演一些無知or 叛逆少女的配角)。
     
李麗蕊小姐「逆之女」好似幾劣評如潮,我記得我的姑姐看完她的MV後,十分不屑地說:整古做怪/古靈精怪/鬼五馬六/唔三唔四(大慨係呢d wording) 
 
 
 

Anonymous said...

"《Crazy Lady》原曲是河合奈保子85年的單曲《Through The Window》,河合當年搵咗鬼佬音樂班底撐場,幫佢作曲同製作過一張唱片,佢仲親自飛埋去L.A.錄音架。"....

Glad that someone remembers 河合奈保子. She did a few albums with a bunch of West Cosat musicans back in the mid-80s. It was considered very unusual for some idol singer to do that. In fact, some of the work (デイドリーム・コース, Nine and a Half) are very high quality albums for any idol singers in the 80s. I think Naoko has been underestimated by most people as just another idol. To me, she does have some real musical talent and that has been proved by her writing her own songs starting in the last 80s.

Anonymous said...

如果提到唔知邊屆新秀,係咪指「董嵐」呀?
若然係,應該係方曉虹嗰屆,同年銀獎係劉錫明。

查比斑特頓 said...

我當年最鍾意,傷心天使和crazy lady

另外,我覺得是否改編歌,是不重要,
最重要是好不好聽, 我聽過不少改編歌比原唱好聽, 又或較適合香港市場

而且本地人材始終有限, 所以無可厚非.
聽過一些新人唱的歌和詞, 令人可怕
,本地創作的好歌又輪不到他們唱;
改編歌是另一選擇

八十年代,普遍一年出兩大碟,有的多過兩隻, 真的本地那裡有那麼多好作品呢

sidekick said...

係囉係囉, 我都第一時間想問點解冇提"蛻變"~

另, 李麗蕊之前, 應該係露雲娜.
即係:
露雲娜=> 李麗蕊=> Twins

Agnes Tse said...

好似叫董嵐. 唔該.

Anonymous said...

路過一句, 溫兆倫隻mv內的女主角, 看來應不是何美婷, 無記錯好似一位港姐來的...不過真係不記得名字了.....

chi said...

係喎,真係邪,以前睇一直覺得是何美婷,但經你一講,才發現一點也不像何美婷。

至於她是誰,要請教選美學教授阿Fun了。

Anonymous said...

應該係85最上鏡小姐:劉碧儀

Anonymous said...

李麗蕊仲有首同賈思樂合唱o既atv劇同名主題曲,"觸電情緣"
http://youtube.com/watch?v=Hmg5q9b7-nA

Anonymous said...

周潤發的十二分十分吋推出時間是 88 年 10 月,跟 激情十分 相距兩年呢

Louis said...

李麗蕊絕對唔雞仔聲, 聽下比《小妹妹日記》早兩年嘅《快將煩惱盡忘記》就知, 《小妹妹日記》大碟 Sara 竟然夠膽翻唱關菊英《我是痴情無限》, 唱得出乎意料地有韻味, 唔知你有冇聽過:

http://www.aiting.com/MusicData/play/3540.html

關菊英唱功老練, 帶幾分風塵味, 而 Sara 就多幾分少女情懷, 別具氣質!!!

Louis said...

論唱功, 李麗蕊好過好多同期出道歌手, 唔係佢想唱「西歌」, 只係唱片公司唔識貨, 或者佢後台唔夠所以唔肯俾好歌佢唱, 唔該你地聽下佢首《我是痴情無限》先!!!

我咁肯定當今世上除咗原唱者關菊英, 絕對無人夠佢唱!!!!!

Anonymous said...

http://www.hkreporter.com/talks/post.php?action=reply&fid=631&tid=252488&extra=page%3D2


中文歌曲龍虎榜
冠軍歌曲紀錄


1982 年

1.讓我坦蕩蕩 鍾鎮濤 2.在原野上 關正傑 3.水上人 鄧麗君 4.沙漠小子 林子祥
5.告訴我 葉麗儀 6.最佳拍檔 許冠傑 7.不可以不想你 鍾鎮濤 8.蒙塵的巨龍 張明敏
9.木頭人 甄妮 10.好姻緣 汪明荃/羅文 11.童年 張艾嘉 12.彩雲曲 雷安娜
13.大號是中華 徐小明 14.歸航 方伊琪 15.稻草人 李龍基 16.空山靈雨 鄭人文
17.雨絲情愁 譚詠麟 18.心事 黃綺嘉 19.讓我帶回家 鄭少秋 20.雨忘煙水裏 關正傑,關菊瑛
21.今晚夜 陳潔靈 22.再等待 葉振棠 23.情若無花不結果 張德蘭 24.人之初 蔡楓華
25.漣漪 陳百強 26.詠梅 關正傑 27.紫玉墜 張德蘭 28.早春二月 蔡楓華
29.萬水千山縱橫 關正傑 30.身體語言 羅文


31.快將煩惱盡忘記 李麗蕊



32.可愛的笑容 彭健新
33.夢裏夢外 鄧惠欣 34.痴心開心的我 區瑞強 35.花艇小英雄 李龍基 36.勇敢的中國人 汪明荃
37.感情的段落 林志美 38.初次嘗到寂寞 鄧麗君 39.珍珠淚 陳美齡 40.那天再重聚 區瑞強
41.小生怕怕 譚詠麟 42.忘盡心中情 葉振棠 43.心債 梅艷芳 44.我是中國人 張明敏
45.古都羅馬 林子祥 46.星星問 徐小鳳




阿蕊係《中文歌曲龍虎榜》歷來最年輕嘅冠軍歌手(14 歲)!!!

Anonymous said...

李麗蕊 - 《我願》 1982

http://hk.youtube.com/watch?v=EoVfVOSKstc

14 歲已經有咁嘅唱功!!!

先前有班茂炳說三道四, 話阿蕊「雞仔聲」、「西歌」, 混帳之極, 唔該搵個耳鼻喉科醫生檢驗下聽覺先!!!!!