青春活潑《荳芽夢》

作曲 : 聶安達 (Anders Nelsson) 作詞 : 林振強


那一個盛夏光年,1981年的暑假,TVB黃金時間節目大改革,《荳芽夢》是7點檔暑期青春劇,仲有急口令配合宣傳 :

翡翠八月五條龍
電子新聞齊出動
青春活潑荳芽夢
香港八一新劇種
彩色幻化無雙譜
歡樂今宵樂融融

梳孖辮的翁靜晶當然難忘,也有不少人掛住做Ronald的吳民雄,樣子不算英俊,有人甚至覺得樣衰,但歪歪的笑容,迷倒不少情竇初開的觀眾,我最記得他頭上有條永遠的headband。


吳民雄在TVB只拍過一部劇,之後在譚家明《烈火青春》演過配角,有說後來做了電影製片。80年代初打tennis代表中產、健康,他在《荳芽夢》除了永恆有條headband (扮波格),仲有理冇理拿個tennis袋裝模作樣,我不記得他在劇中有沒有打過網球,倒記得有部單車經常推住,然後泊在扮花園洋房的屋企外 (TVB廠景),做他哥哥的林嘉華在劇中是網球教練。


至於翁靜晶,劇中講佢讀中三,紮晒小甜甜孖辮,唧起兩粒酒粒,的確好靚女,但呢挺倚窗發姣樣,今時今日俾同學見到,分分鐘俾人大巴大巴扯。


男的是運動健將,女的當然跳芭蕾舞,這個打扮的翁靜晶實冧死仔。現實中的她是否純過蒸餾水?《荳芽夢》播出後大獲好評,她添食配陳百強拍《突破》,中途因搭上劉家良師傅,被安排在劇中墮崖死去,女角由毛舜筠頂上。我有一次重看單元劇《年青人》(1977),講張國強有個戀兄的妹妹,妒忌他愛上嫩模余安安,而這個妹妹就是翁靜晶,那時她才剛開始發育,《荳芽夢》是她擔演的第一部連續劇。


1981年的少男少女浪漫,有咁老土得咁老土,例如坐沙灘彈結他對望 (著白褲白裙)。


點蠟燭砌心形。


四目交投楂手仔,幾咁唯美主義。


講番《荳芽夢》這首永遠動聽的主題曲,由我們的露雲娜主唱,她和賈思樂做青春偶像的時代已過去,劇中她是女主角的best friend,戴大膠框眼鏡做巴渣妹,在爭仔爭鋒頭的場面中,要和死敵周秀蘭 (not周秀娜) 惡鬥,後面趁熱鬧的是狀王陳復生。

13 comments:

Anonymous said...

唔知翁靜晶今年拜左林律師未呢?

Anonymous said...

經典台幾時重播呢套劇??

Fun said...

首主題曲係超hit!

未經歷過呢套戲嘅網友真係估唔到套戲有幾勁,嗰陣返學第一件事就係圍埋講劇情~

其實ronald響邊暑發掘出黎架呢,佢一講嘢真係忍唔到笑..

我哋一班同學當年勁扮佢講“cindy,我真係好鍾意你架” (w/鄉音)

狀王陳復生> 其實周秀蘭都唔係好好多啦,又係要摑嗰啲..

Anonymous said...

點解叫陳復生做狀王? 係咪因為佢作狀? 其實我對佢最有印象, 係80年代版本"天龍八部"...... 其實以佢咁0既外型, 真係唔明點解佢可以做到花旦, 好似話佢當年仲同翁美玲爭做黃蓉0添, 嚇死!

係呀, 周秀蘭又係好作狀, 尤其"儂本多情", 真係好想大巴大巴 kum 埋去!

lemon tree said...

沙灘上砌心形蠟燭,係大結局其中一幕戲,當時襯底歌曲用咗《天各一方》,成個感覺拍得有D似MV。記得結尾一幕,係Ronald冒著大雨在電話亭,打比住响樓上的Cindy 要求復合,但Cindy之前聽咗阿媽(好似係琴姐飾演)同佢講:「年青人嘅感情,就好似荳芽仔咁,一折就斷,經不起風浪。到人真正成長咗,才會明白乜嘢係真正嘅愛情...」於是Cindy就咁請咗Ronald食檸檬。記得劇終播的最後一首歌,不是主題曲《荳芽夢》,反而用了曾路得《風裡的繽紛》。但歌詞同個畫面很夾,首歌好好聽。初時還以為是齣劇的插曲,後來才曉得原來是電影《文仔的肥皂泡》的主題曲。

Agnes艾麗絲謝 said...

吳民雄副尊容做教育電視哥哥就得.

佢拍過于仁泰"救世者", 飾演木獨鳳姐殺手.

Phyllis said...

睇過翁小姐幾年前係大公報專欄談及拍"荳芽夢"時的花絮

-5位女主角曾經義結金蘭,不過結拜後無幾耐,翁就同周秀蘭反面了!

-劇中5位女主角的造型都係霍耀良搵人設計過,所以5個髮型都唔一樣,不過翁小姐見到譚玉瑛(配角)都係紮孖辮,仲去質問霍耀良.

readandeat said...

唔,我當年看到這部戲,已經嚇到馬上轉台去麗的看《IQ成熟時》,起碼啲角色順眼啲。

吳民雄當年是扮網球巨星波格。天﹗我覺得陳冠希有點像佢。

篤篤篤撐 said...

OH, 當年中三,睇左幾集真係冇心機睇落去, 尤其係ronald, 真係冇說服力....

Anonymous said...

"陳冠希有點像佢"

唔係o卦? 陳靚仔好多!

ricky said...

我最記得我當時兩邊台轉來轉去,所以兩套劇都有某D劇情miss左。《荳芽夢》同《IQ成熟時》當時真係TVB同RTV嘅"世紀之戰"!!
不過講真,鄧藹霖同莊靜而又真係靚女好多喎。查實我頂唔順翁小姐嗰兩條孖辮的...

chi said...

翁靜晶母親趙小瑜在葡京開有賭廳,在澳門有一定地位。她結過兩次婚,首任丈夫是越南富商翁業初,在翁靜晶約一歲時離婚,她帶翁靜晶來港定居。她後來跟名探長李洛夫過從甚密,兩人替賭王葉漢打理澳門賽馬車會。至八七年,趙小瑜跟在澳門從事建築木材生意的劉衍泉結婚,劉現為澳門區全國政協常委,澳門人稱他做「大哥」。

在翁靜晶的著作《瑣見瑣文》中提及:「母親曾是江湖中人,遇上『江湖救急』,道上的大佬細佬,只要走佬,各路人馬都會大解慳囊『慈善籌款』。」她亦在專欄中這樣寫:「她雖然金盆洗手,卻仍有數千旗兵擁護追隨,豪氣不減當年……母親大人,是惹不得的人物。」

shangri_la said...

> chi said...
>
> 翁靜晶的著作《瑣見瑣文》中提及:「母親
> 曾是江湖中人....
>

It is true, and that's why many of my family (my mother's side are from Macau) don't have a very good impression of 翁靜晶 and it was only until I bought my mom her book 《危險人物》 that my mom has changed her view on her.

I remember in a radio interview 翁靜晶 said it was her unique background that she bonds better with father figures. She was already with 劉家良 at the time but I would say 劉家良 is more like her grand-father figure to her.