張國榮告別樂壇演唱會，星光熠熠，真要數勻捧場圈中人，可能填滿三百幾個格仔，有呃稿費之嫌。那天，在紅磡體育館舞台之上，張國榮施盡渾身解數，唱勁歌夠勁，唱情歌有感情，驪歌輕唱，唱到歌迷動容。在台下，一樣很有趣，精彩，在台上的張國榮一定不會知道的。
捧張國榮的圈中人實在太多，為了不想有呃稿費之嫌，係咁意數十個八個，有發仔夫婦啦、成龍、王祖賢、李嘉欣、關之琳，程小東、關錦鵬、鄧萃雯、陳慧嫻、岑建勳、張婉婷、羅啟銳、陳寶珠、薛家燕 …...（呃夠啦，唔數啦！）。
岑建勳出現，立刻聽見有人話：「岑建勳！好嘢，民主萬歲。」令岑建勳的民族英雄感大大擴張。佢話：「都算啲人明事理。」個樣好安慰咁。發仔本來係欣賞榮仔演唱會，以為擔定櫈仔，霸頭位有著數，影壇大哥大嘛！恒星梗係安排佢坐第一行。點知，熱情歌迷，管他大哥定發哥，一窩蜂湧落來，同阿榮握手時，踩到發仔隻腳扁晒，大腳發變扁腳發。有些歌迷認真食得唔好嘥，一見發仔，係咁捉住佢話要同佢影相，象徵式問發仔好唔好？發仔梗係話好，立刻有兩個女歌迷霸咗佢兩個大脾，一個唔該就坐落去。發嫂又點呢？佢都無眼睇囉！點知老公俾人「非禮」，因為台上太感動，佢顧住喊，乜都睇唔到，喊到無紙巾，成日問柏安妮攞！「乜你都喊呀？」問柏安妮，因為阿ANN嘅性格唔似咁軟弱。「最衰係麥潔文啦！我見佢喊咪喊埋一份囉，我淨係喊咗少少咋。」阿ANN埋怨麥潔文之餘，乘機為自己澄清。
麥潔文變大喊十
「又關我事？不過，我真係好服張國榮，我呢世都唔使旨意開告別演唱會。如果係我開，一上台就劈開喉咁喊，泣不成聲，喊足兩個鐘頭，一句歌都唱唔出。」麥潔文說。睇咗幾場演唱會，佢個新花名叫「大喊十」。
羅啟銳嘅現場遭遇又點？佢話：「『嘩！啲歌迷好熱情，我後面那位女仕，興奮到又叫又跳，我隻耳仔幾乎聾，佢成日踢我張椅背，我俾佢踢到彈起。」張婉婷就話：「佢好可憐呀！送花俾張國榮，好多次都唔成功。不過，我仲可憐，佢束花成日擺在我頭項，佢一拍手，那花屑全掉在我頭上。」乘機埋怨羅啟銳。成龍話：「好囉！張國榮走咗，我有機會上台表演。」
黎小田歎句太衝動
梁李少霞說：「我唔反對佢退出樂壇，佢在樂壇嘅成就，的確令佢滿足；但係，睇佢嘅眼神，佢嘅演技不下於發仔，如果在電影發展定有更高成就，為何要退出晒幕前咁笨！佢會好唔甘心㗎！」至於阿榮嘅老友兼恩師黎小田又點會唔喊呀，佢話：「哎！佢又係太衝動嘅！三十五歲至退休未遲呀！」張國榮舉行封咪儀式時，走近咪台，一步一神傷，歌迷更瘋狂，大叫唔好之餘。有人話：「你諗清楚呀！你真係諗清楚呀……」
屬下搵工跳槽
張國榮手下有不少愛將。在祝捷酒會上，其助手的心情跟張國榮一樣難受，佢話：「我夠唔捨得囉！講真，有時佢都幾難侍候，佢勝在做人夠真，從來唔篤人背脊，鬧完就算。」另一個話：「又要搵工眺槽，連老細都走埋。」個樣好憂怨，到此方知張國榮其實養咗一大棚人，大有樹倒猢孫散之感。其實，最難過要算是陳淑芬，佢同張國榮同甘共苦，大家有今時今日，都係靠兩人齊心協力去打天下。張國榮去任何地方演唱，都是足不出房門，係無辦法出去，歌迷太多，佢都寸步難行，身為經理人的陳淑芬也得陪住佢在斗室。在酒店房間無聊時，我笑佢兩個：「成日你眼望我眼，過著看海的日子。」告別演唱會曲終人散後，看海的日子再也不復還，怎不教他倆懷念。
抵多謝之人
陳淑芬說：「去邊度登台，對我都無分別，我只係可以在酒店間房踱來踱去。」各國景緻，她與張國榮都未試過映入眼簾。奔波歲月中，陳淑芬與張國榮點會無拗撬呀？兩個人成日會為公事各執一詞，張國榮其實係個口硬心軟的人；陳淑芬剛剛相反，佢係口軟心硬的人，張國榮在台上也讚過經理人，魄力猶勝鬚眉。這個口硬的人，難得日日面對萬多觀眾衷心地向經理人表謝意，謝足三十三場，算起來起碼有三十幾萬觀眾知道，想真，陳淑芬確是為張國榮出過唔少力，所以抵多謝。
No comments:
Post a Comment