虛擬《華星傳》



華星娛樂在1971年成立,70年代做過什麼,似乎冇人記得;82年和TVB合辦新秀,才開始發光發熱,並在同年推出首張唱片,無線群星的《群星高唱》(編號1001),第2張是陳美齡《灕江曲》(編號1002),第3張就是梅艷芳《心債》(編號1003)。

華星的崛起,正遇上我開始聽流行曲的年代,這輯虛擬《華星傳》4CD,牽動不少成長回憶。

Disc 1 (新秀搖籃)
參加新秀贏了,未必一帆風順,歷史證明除了阿梅,冠軍不一定最紅,以下新秀起碼有幸在華星出過個人唱片,紅不紅是另一回事。

01. 梅艷芳 - 心債 (1982)
80年代第一個一夜成名,超hit的《香城浪子》主題曲,港版《愛與誠》、吹乒乓、黃日華、莊靜宜、湯鎮業、細佬梁朝偉青靚白淨...我記得六年班大旅行,因落大雨要留在旅行車上唱歌,我和同學唱《心債》,她每件事於我都是神話,第一首歌已是經典。梅艷芳02年轉投正東。


02. 呂方 - 可會遺忘 (1984)
第一張碟和小虎隊分享一張黑膠碟的兩面,而且唱國語,奇奇怪怪,我冇聽,到了第二張碟《聽不到的說話》才大hit,我中一時假音好勁,曾經諗過用這首歌參加校內歌唱比賽,當然沒有啦;我買過他第三張碟《求你講清楚》,綠色氣泡似雪碧,對《養你一世》有特別的記憶,最近演唱會有唱,好開心;呂方90年跳槽華納。

03. 小虎隊 - 忍著淚說Goodbye (1984)
我初中時好hit,被同學改為《忍著尿說Goodbye》,我其實覺得太乸,不太鍾意,唔知點解呢隊跳舞boy group咁短命,不知何故解散,後來俾草蜢威晒。

04. 杜德偉 - 只想留下 (1987)
我中學時最喜愛的男歌手,對我來說是性感兼有才華的偶像,改編George Michael R&B作品,我一聽就鍾意;第一張碟著背心,嘩!最愛第二張大碟《等待黎明》,side cut歌《不要重播》一流。知道他揀件君如做女友,我當時唔係好信架;90年跳槽華納。

05. 許志安 - 戀愛片段 (1988)
他一出道做阿梅《將冰山劈開》和音,也有得拍MV,第一張碟太正路,反應平平,開始玩妖才有noise,我對他感覺不大,直至《不倦的蝴蝶》才鍾意,周耀輝寫詞嘛。《戀愛片段》推出時我覺得係改編Love Story的老土情歌,唔掂;96年跳槽正東。


06. 江欣燕 - 情誼在心中 (1988)
只出過一張EP,最記得俾人笑佢封面形象似利智,這首《龍貓》主題曲我都冇印象,如果可以,不如揀她扮阿梅唱《愛醬》。

07. 譚耀文 - 為你解悶 (1989)
一開始太似張國榮,華星捧極唔起,我鍾意過他唱《長夜怨曲》和《忘形Champagne》那些Jazz feel。他出了三兩張碟後,轉投蚊型唱片公司,偶有佳作既。

08. 林楚麒 - 這就是愛 (1989)
巨肺型,代表作是參加新秀時被撞跌咪,不慌不忙執番起再唱,被讚有大將之風,只拿銅獎也氣勢強勁,我記得報紙有說阿梅忌她三分;度身訂造這首晒冷歌,給她參加上海巴黎歌唱比賽,嗌爆咪高音曾令我興奮過,但只出過一張碟便消失於樂壇。

09. 鄭秀文 - 思念 (1990)
她以學生身份參加新秀,在我們學校有掀起過話題,等了兩年才有碟出,但改編淑樺姐的《夢醒時份》,珠玉在前當然輸硬;第二張《Holiday》我現在仍覺是正碟一張;由頭到尾都咁有feel,下意識還覺得度假concept是抄憶蓮的《逃離鋼筋森林》;95年轉投華納。


10. 梁漢文 - 想著妳‧等著妳 (1991)
第一首歌就勁玩假音,他一出碟時我覺得他幾堅,後來不斷出產K歌,唱家班感覺不強,《纏綿遊戲》曾是我的飲歌,但他一直被壓在二哥位置;01年華星唱片部結束後失業,直至02年簽金牌。


11. 車沅沅 - 始終想你 (1993)
92年拿新秀冠軍,我記得馬臉陳剛上任,係威係勢說要立即替她出碟,但拖拖拉拉到93年才出,氣勢已靜過鬼;在華星只出了一張碟,之後個名改來改去,公司轉來轉去。

12. 張崇基張崇德 - 龍珠 (1994)
第一次組合拿冠軍,悶;華星幫他們改名做無印少年,仲悶;唯一華星碟《新生日》,唔掂;96年去台灣轉投波麗佳音,都唔掂;01年回港自資出碟,不是不唱得,只想勸他們不要染金毛/穿雞翼袖。

13. 李玟 - 我依然是你的情人 (1995)
參加新秀時叫李美林,華星罕有地送歌手去台灣出國語碟,改名李玟;後來轉投新力,做到台灣天后。唔關我事,她唱粵語國語英語都引不起我的興趣。

14. 陳奕迅 - 時代曲 (1996)
96年某一期《Amoeba》封面是陳奕迅,竟然覺得他幾靚仔,只此一次;第一次覺得他好聽,是拿了公司的《與我常在》CD回家,聽到《那一夜有沒有雪/說?》,其實那張碟首首好歌。他第一張碟平實,我沒有留意,唔明點解華星復刻CD只出了這張碟,快些出番其他碟啦;00年轉投英皇。

15. 楊千嬅 - 狼來了 (1996)
有Evi Yang的楊千嬅,才有那種文藝+潮流的獨特感覺,《出埃及記》聽到睡不著...她離開華星後,我不太找到舊味道了。華星舊作中,我偏愛《字跡》,楊千嬅識作曲o架,李敏也少有寫出如此細膩歌詞;《狼來了》也不錯,兩個編曲版本都好,06年紀念出道10年的《郎來了》,我聽不下去;楊千嬅01年過檔新藝寶跟Paco。


16. 何韻詩 - 光榮之家 (2001)
何韻詩第一張EP,於我和盧巧音《不需要...完美得可怕》一樣好感強烈;她01年開始行好運,最記得華星執笠,記者關心何韻詩去向,她說,我已秘密簽了EMI。


Disc 2 (阿哥阿姐)
華星特別鍾意花巨款簽哥級姐級歌手,其他人唔知,好似話92年簽林憶蓮,花了一千萬,華星就給人這種豪華的感覺。唱片包裝也是,火紅透明膠、雙封面任揀、白色珍珠色、三隻色任揀,相框式封面,剪影die cut,都是這間公司令我難忘的出品。

01. 沈殿霞 X 石修 X 何守信 X 李司棋 X 林嘉華 X 胡燕妮 X 黃日華 X 黃淑儀 X 楊群 X 趙雅芝 - 群星高唱 (1982)
從沒印象華星出過呢張雜錦碟,咁70年代,估不到是82年華星創業作,卡士強勁,應該出復黑版啦。其他歌包括林嘉華 X 趙雅芝《愛在心內暖》、胡燕妮 X 楊群《舊夢不須記》、何守信 X 李司棋《倩影》、石修 X 黃淑儀《願你待我真的好》,嘩,我想聽。

02. 陳美齡 - 灕江曲 (1982)
跨國電視大製作《馬可孛羅》,當時吹捧到好勁,我印象中勁悶;陳美齡客串少女一角,講到鬼咁勁,打入荷李活咁滯,我當時一點也不懂得欣賞,插曲《灕江曲》,鄉土歌一首咁囉,中學生如我好抗拒。

03. 陳潔靈 - 無言地等 (1983)
82年我沒留意這首歌,後來買番精選才喜歡。中學時看陳潔靈、張國榮MV,常覺得他們姊弟戀,原來年齡應該差不多,那時陳潔靈對我來說太成熟;她是早期Adult Contemporary歌手,我到了90年才慢慢喜歡她,如《風火海》,講片刻偷歡;《當天那真我》,林振強佳作;她87年回到華納。


04. 羅文 - 同途萬里人 (1983)
早在EMI,羅文已做盡經典嘢,例如裸照做單曲封面;他來到華星,第一首hit歌《同途萬里人》,收錄在沒有他樣子的《絲綢之路巡禮名曲集》,我中一時,無線在黃金時間播日本人拍的絲路紀錄片,是一件創舉,我和同學都話畫面勁,喜多郎勁。羅文第一隻華星碟《愛的幻想》唔hit,只是郭啟華在深宵節目播番出來,才令我覺得是好嘢;他90年轉投世紀唱片。

05. 張國榮 - 風繼續吹 (1983)
第一次知道孫淑興,是《號外》美指/攝影;第二次是為葉德嫻《你留我在此》攝影;第三次是《風繼續吹》美指/攝影,那條頸巾,刻意得來咁靚,是我當年對這張碟的印象,中學時我既非張派亦非譚派,對張國榮歌曲,我感覺不大;他87年跳槽新藝寶。


06. 汪明荃 - 傾城之戀 (1984)
意外地覺得阿姐唱《傾城之戀》可以咁好,冇失禮張愛玲,汪明荃由pop icon變cult icon當中的微妙變化,不是一般電視劇觀眾明白到;汪明荃88年返回娛樂。


07. 關菊英 - 新的一頁 (1985)
貝殼封面,揭開是她的珠珍形照片,爛裙、forward頭、metalic頸環腳環,濟州島外景拍攝,珍珠色膠碟 (內含珍珠末?) 主打歌唱離婚,成件事over到令我在中三時驚歎,愛不釋手,由頭「論」到落尾,而家諗番真係好camp。

08. 劉德華 - 只知道此刻愛你 (1986)
唔好笑,我真心覺得他第一首華星歌好聽,即使他幾咁唔服氣 :《為你鍾情》我早過張國榮錄了,我當時覺得《只知道此刻愛你》好聽過《為你鍾情》。這張碟封面,他穿透明膠恤衫,上面印音符,好有造型架;他88年加盟EMI。


09. 梁朝偉 - 朦朧夜雨裡 (1986)
那時未有autotune,朝偉走音都出到碟,音準朦朧,是我和同學的笑話,「這一晚怎可是但」,口語化情歌,恕未能接受,阿梅93年重唱都救唔番;朝偉在華星出了兩隻碟,多過劉華黎明;他直至93年才在台灣藝能動音出國語碟。

10. 甄妮 - 冷冷的秋 (1987)
大姐常說要收斂巨肺唱功,《最後的玫瑰》已試過,《冷冷的秋》是第二次,都舒服0既。不過佢大勢已去,華星兩張碟都仆,89年急急回到新力。

11. 成龍 - 英雄故事 (1987)
嘔。


12. 倫永亮 - 歌詞 (1987)
後來才知,倫永亮和當時的華星高層蘇孝良是好朋友,所以出了《還我所有愛》大碟,只此一張,diva腔令人受不了,還有超搞笑的《午夜蛛蜘》,一百個為什麼...

13. 鄭少秋 - 誓不低頭 (1988)
留在娛樂咪好囉,唔知點解要入華星,出了一張碟又走咗。


14. 郭富城 - 第四晚心情 (1992)
他未唱歌前,我已留意他拍《傻女》《留下陪我》和露雲娜《手掌上的電話號碼》MV,他做了歌手,反而冇乜興趣。只記得他在華星出過一張國語碟,著背心在瀑布淋水,賣肉咁囉。

15. 林憶蓮 - 沒結果 (1992)
憶蓮入華星,是一個錯誤,那時根本不夾,為了彌補這個缺失,唔揀華星第一碟《回來愛的身邊》的主打歌,一定要揀她嗌得最激的《沒結果》。


Disc 3 (新秀棄將)
年年出產冠亞季,還有最具台風最具潛質,簽埋簽埋出唔切,呆坐幾年只錄了兒歌一首、大合唱一首、或EP一隻,有些轉公司先有得出頭,有些是是但但出了碟,隨即被遺忘人間。

01. 胡渭康 - 黃金戰士(1982)
人夠高大,但把聲娘娘腔,唔係好得。

02. 蔣慶龍 - 共享陽光 (1982)
有friend話佢好靚仔,我印象不深,只記得他客串《儂本多情》。


03. 戴蘊慧 - 我係小忌廉 (1984)
她唱流利日文《禁區》(加動作),係好經典,我覺得她把聲沉沉,幾有格,90年轉去Epic出《Opening Line》,我支持她的《西飛客機》和《下雨的Saturday》。

04. 張衛健 - 足球小將 (1984)
唔係我杯茶。92年在華納有碟出。

05. 蘇永康 - 妳是我靈魂 (1986)
在華星零發揮,89年過檔林慕德公司,《失眠》賣白金,我戥過佢開心。

06. 孫明光 - 微風中 (1986)
好歌一首,舒服。不過後來發現和《不信愛有罪》編曲一樣,

07. 方曉虹 X 劉錫明 - 胡漢夢 (1987)
唔記得劉錫明是不是新秀,但他起碼有得轉去華納出碟,新秀方曉虹就冇咁好運。

08. 文佩玲 X 杜德偉 - 留住這時情 (1986)
文佩玲也是梅腔派,89年過檔EMI,「Jack Jack Jacky」都幾勁0架。

09. 莫鎮賢 X 歐陽德勛 X 林楚麒 X 戴蘊慧 X 蘇永康 X 張衛健 X 杜德偉 X 羅文 - 浪淘沙 (1986)
當中有個歐陽德勛,我記得《忍者小靈精》是他唱的,有冇人記得呢?他91年轉公司去Epic出過一張碟,製作唔錯。


10. 湯美君 - La Luna (1990)
拉丁節奏深得我心,我鍾意過的上榜歌。不過她和方曉虹一樣,是最霉的新秀冠軍。

11. 林漢楊 - 戀愛方格 (1990)
有人記得他嗎?和梁漢文同碟出了四分一張《細聽鋒芒》。

12. 陳浩民 X 車沅沅 X 張崇基 X 張崇德 X 李美林 X 許志安 X 鄭秀文 X 梁漢文 - 愛情傻戀La La La (1993)
陳浩民簽過華星?唔查番credit真係唔記得,他後來又跳槽星光出了隻《完全自我手冊》,之後又去了環球,估佢唔到咁多公司肯簽佢。

13. 徐鎮東 - 流星的傳說 (1993)
毫不起眼的新秀,毫不起眼地出了個人大碟,然後消失,我那時以為plug了歌,但沒有出碟,原來有得賣,華星人事大變動的犧牲品。

14. 海俊傑 - 永遠的偶像 (1994)
個朵認真大整蠱,和馬浚偉的「他不是黎明」一樣;他重唱《微風中》也不及孫明光原版討好。

15. 張崇德 X 海俊傑 X 戴恩玲 X 唐文龍 X 梁漢文 - Wish You Well (1994)
聖誕合唱歌,由梁漢文領隊,聲勢弱到。

16. 黎明 - 恕未從俗 (1994)
黎生在華星從沒出過歌,這首好似是他紅了後翻摷出來的倉底貨。


Disc 4 (有心無力)
華星乜嘢project都搞過,內地天后簽過,同志劇團簽過,古裝音樂劇都搞過,同做人一樣,一間公司做過咁嘢,執咗笠都算無悔啦。

01. 賈思樂 - 我的心向著你 (1984)
驚嚇,我只記得MV有好多花旦一齊拍,包括汪明荃、陳玉蓮等等,講到佢好有女性緣咁。

02. 歐陽佩珊 X 羅文 - 恩似洞庭水 (1984)
羅記在利舞台搞《柳毅傳書》,蝕到眼坦坦,華星還幫他出原聲大碟,女主角是歐陽佩珊,她在70年代出過不少碟,類似《民間傳奇》的歌曲,我就未聽過0勒。

李中浩 X 梅艷芳 - 邁向新一天 (1985)
這首歌hit過的,李中浩和梅艷芳拍《歌舞昇平》,所以有這首電影主題曲,李中浩自己屬於小型唱片公司,有首《手套》是跳舞歌曲。


羅明珠 - 中四丁班 (1986)
無線青春劇,主題曲唔益華星歌手,反而找了非歌手的羅明珠,她和李克勤亦有合唱歌。

白嘉倩 - 偉大 (1993)
用rap唱自己肥,Maria、肥肥、張偉文都冇佢咁夠薑。

毛阿敏 - 我不想再次被情傷 (1993)
我有買,好記得唱片封面是軟硬做art direction,玩black on black,誓要將大陸天后娘味洗掉。

戴恩玲 - 查你的天使 (1995)
完全不記得她的第一張碟,似兒歌碟多啲;第二張碟突然著吊帶裙,令人措手不及。

唐文龍 - Deja Vu (1996)
有人以為他可以做郭富城,錯誤地出了這張碟。

何超儀 - 多麼掛念你…男人 (1996)
當時不少人覺得她唱得,係有型0既,唔寸的話好D。

非常林奕華 - 1996窮得漂亮 (1996)
郭啟華主理華星,磨拳擦掌創立Play Music,出了非常林奕華的《向悲慘世界乞錢》,嚇親聽眾,未幾公司大地震,計劃全部夭折。

黃秋生 - 無能用者 (1996)
改朝換代前出的《獨立獨表作》,有這首近粗口歌,郭啟華計劃夭折後,黃秋生過檔香港滾石。

Black Box - 這片悠然地方 (1996)
《獨立代表作》另一作品,地震後亦過檔香港滾石,碟中其他獨立樂團/歌手還有黑鳥、So So、William Tang、Ted Lo。而碟都出唔切的單位有Minimal、蔡德才的普普樂團、潘源良 (我記得已plug歌)。

古天樂 - 男朋友 (2000)
鄭伊健與吳卓羲中間的樂壇恐怖份子,飲歌還有《今期流行》。

梁浩賢 - 一人同樂日 (2001)
陳奕迅楊千嬅相繼跳槽,唯有捧新人,2000年新秀冠軍,只出了一隻AVEP《Ho Yin》,公司好快摺埋。

歐倩怡 - Get It Right (2001)
華星唱片部結束後,被拖欠數萬元人工,幸而有首《問題天天都多》,可以登吓台唱吓兒歌。

2001年10月20日,華星遣散員工,餘下歌手解約,運作近20年的唱片部結束,只剩下版權部營運至今。

21 comments:

Agnes said...

林楚麒: 是不是黃家駒女友?
張崇基張崇德: 古惑仔信耶穌?!
李玟: 所有香港樂迷都不喜歡她, 可能正如她自己漏左口風: "我是機會主義者". 喜歡她唱廣東歌《2090再愛你》, 卻很討厭她係唔係都露肉.
陳美齡: 我有《灕江曲》的華星盒帶^^ 整碟風格唔係好統一, 但我幾鍾意
成龍: 佢首警察故事, 經典. 俾人改到笑死

Wordy said...

「汪明荃由pop icon變cult icon當中的微妙變化,不是一般電視劇觀眾明白到」:版主,這會是個好題材
劉錫明:新秀亞軍,同屆金獎正是方曉虹(嫁了給李子雄嗎?)
「Jack Jack Jacky」好像叫《浪子 Jacky》。還有一首悶爆中快板的《鬥氣》。
徐鎮東:好紮實,參賽時是消防員
「古天樂:鄭伊健與吳卓羲中間的樂壇恐怖份子」:好句!

看了你年多,這網誌很少教人失望。

m@linxism said...

恕未從俗是89年電視劇'回到唐山'的主題曲, 不可歸為94年......

當年是 LEON FANS 妹妹仔上

chi said...

To m,

《恕未從俗》89年有沒有出碟?歸類94年,是因為我記得在那年雜錦碟《男兒本色》才重見天日。

eric said...

憶蓮跟華星唔夾,選"沒結果"反而是大路之選, 憶蓮在華星最耀眼的side-plug.

m@linxism said...

咁又無出, 不過劇都出埋, 唔可以咁計卦~?

個人黎講會 prefer 計歌曲出生年份~

LBST said...

1. 江欣燕-聽番都覺得好好笑。
2. 杜德偉-今夜星光的那隻碟好聽。
3. 點解無成龍那隻小雨點-午夜吻別前
都唔寫?
4. 群星高唱這隻碟。我勸您不要聽。
(我都唔明點解當年拿到金唱片.)
5. 劉德華第一隻碟是最好聽的。
6. 有兩隻歌無落喎。
火熱動感瓜瓜瓜,愛情傻戀嘩嘩嘩。
7. 其實好想華星出番
Elisa Chan 的CD。
8. 蔣慶龍後來出過了一隻叫Made in
Hong Kong 的 EP。 http://www.waiyinworkshop.com.hk/songs/madeinhk.mp3
9. 賈斯樂 - 我的心向著你
我反而好想睇番個MV。
TVB個經X台星期日播番
少年十五二十時。

多謝又喚起我等老餅的回憶。

Lemon tree said...

賈斯樂「我的心向著你」原來有拍過個MV家,真係唔講都唔知喎。但我仲記得首歌嘅旋律係好好聽家,印象中作曲人個大名係玉置浩二,但奇怪首歌嘅風格又唔似係改編自「安全地帶」D歌喎。

「我的心向著你」當年好似剩係收錄係華星一張雜甘碟度,後來有無出返係其他CD度家,講下講下忽然好想聽返呢首歌呀。

Agnes said...

方曉虹係嫁左俾李子雄嗎, 係加拿大, 有個仔.

火熱動感la la la, Red Hot Hits第一擊, 小妹的"賣飛佛".

best actor said...

最記得呂方第三張碟《求你講清楚》,綠色氣泡似雪碧……

無錯啊﹐0個時係汽水公司贊助嘛﹐好似除0左綠色款﹐仲有橙色款0既。p.s. 之前仲有傑佬Fit佬高佬仲有唔識演戲0既曼玉嘉玲﹐講都唔信。

black lab said...

同意wordy..."這個blog很少教人失望"
1. 林楚麒→後來有喺台灣出過碟
2. 羅明珠→據說係有簽華星既,所以先有主題曲俾佢唱。而同李克勤合唱果首收錄喺李克勤《夏日之神話》大碟,係另一齣劇《不再少年時》既插曲。
另外,羅明珠同呂方有唱唱歌《清風是你》,收錄喺呂方《聽不到的說話》大碟。
3. 賈思樂隻《我的心向著你》有出現過喺華星d精選入面。
4. 羅文+歐陽佩珊既合唱歌,個人比較鍾意《不肯忘》。

black lab said...

80年代既華星係好有「骨氣」既,唔肯出炒冷飯精選,就算係雜錦碟都全部用新歌,如《華星影視新節奏》。又唔會出remix。俾人感覺好貨真價實。
演至末流 (及現在),全部出舊歌精選......見證一間唱片公司既興衰。

Yu said...

纠正一下:谭耀文那首是《长夜怨曲》。
如果没认错,郭富城貌似也在林珊珊《痴心》MV中也出现过。
又:很高兴可以看到华星唱片目录的updated version,有心啦!我在2001年左右根据手上资料编辑了一个版本,在大陆新浪锦瑟论坛首先发布,然后被网上广泛摘用,不过因为资料有限,只写到CAL1207(不包括karaoke VCD和LD),还是有些遗憾。今天终于看到完整版本,多谢多谢!~
--铅笔小丁

铅笔小丁 said...

关于贾斯乐的那首歌,我至少对照过玉置浩二和安全地带最早期的几张碟(后期翻唱年份不符合)里的歌,听上去应该不是翻唱其中的,但不能排除他是翻唱玉置浩二写给其他日本歌手的歌。~

Kenny Lai said...

華星的remix只有89年的《辣到跳舞 Summer Remix》,梅艷芳+張國榮+杜德偉+譚耀文。

版主,趁假期好整埋新力傳同EMI傳喎,我預訂。

lemon tree said...

鉛筆小丁,謝謝你的對照。

我也覺得似係改編自玉置浩二作比其他日本歌手唱的歌多啲。在八十年代初,玉置浩二曾經幫一些偶像歌手創作過啲旋律悅耳的上榜單曲,例如齊藤由貴的「悲しみよこんにちは」(悲哀的午安)…等。

Fun said...

小虎隊當年出好多學校show架,但係胡渭康次次都俾人狂噓到死!唔知華星係咪見咁樣所以唔敢同佢地出碟?!話時話我早排響地鐵見到胡渭康喎..

應該係"忘形champagne"!

我當年唔知點解都有買群星高唱既cassette,真"R"頭!當時呢隻碟有D宣傳攻勢架,好似有一晚成晚EYT佢地包晒!

無言地等應該係83年出架。

倫永亮先生既"還我所有愛"大碟入面仲有另外一首"滄海遺珠"叫"八級戀火",係改中森明菜既"Desire".. 第一句歌詞係"八級八級八級八級.. 戀火~~~"!

蔣慶龍響心債大碟入面有首"始終怕講"都ok架。佢後來有拍過"儂本多情"!

林漢陽即係後來既漢陽,同小雪合唱過。

方曉紅同李子雄結婚之後移民左去多倫多,仲開左間婚紗店。

華星影視新節奏系列我有兩隻歌好鍾意,第一輯有一首叫"形影不離",係呂方同一個不知名女仔方韻詩合唱,男唱國語女唱廣東,都幾camp架。另一首係第二輯入面,戴蘊慧既"誰在笑我",都係改日文歌,我記得戴蘊慧有響EYT唱過,有晒成套台風架。

陳美齡最後一隻廣東碟係"愛的HARMONY",個MV既男主角係陳庭威,呢個配搭都夠好笑啦!

m@linxism said...

郭富城仲有幾個 mv 添架. 之前 youtube 有出現過, 蘋果同 3 週刊仲有專題添. 好似蔡齡齡同林志美都有, 陳慧嫻除左傻女仲有一首, 仲有陳潔靈今晚夜都係 (呢個係網友發現, 我之前睇都唔發現~~)

Wordy said...

郭富城 MV ,除左《傻女》外,最記得鄺美雲《留下陪我》

black lab said...

oh~ 我都鍾意《形影不離》&《誰在笑我》呀!
可惜《誰》由始至終都冇出CD版。

我都記得戴蘊慧上EYT唱呢首歌既情景,著蝦肉色西裝褸,有幾吓舞步我都仲記得,當年應該係佢會考放榜之前一晚呀!

jojomamani said...

我也很喜歡 ”形影不離“ ,令我回憶當年我隻身到絲路旅遊時遇上的一個小女孩,她當時正帶上了這片錄音帶。我們一起從敦煌走到烏魯木齊後就分道揚鑣。她約了朋友在烏魯木齊等,我就要回香港趕project(其實敦煌是我計劃的最後一站,到“烏”已遲了五天),至此失去了聯絡。裡面的歌詞跟途中的景物配合得沒話說。回香港後買的錄影帶因為多次轉換音響制式而失掉了。請問這首歌有沒有CD版?真的很想再擁有這首歌,Thx!