8月笑片火玫瑰



好懷疑,點解有些人拍完一大堆電影,仍然唔識做戲;溫碧霞明明拍過關錦鵬《地下情》、麥當雄《停不了的愛》,和不同大導演合作過,來到電視台拍劇,個個鏡頭只會碌大對眼,用氣聲講對白。

溫碧霞 + 周潤發 - 地下情


經典台播《火玫瑰》,等《神女有心》開場前看了一集半,當年只記得海潮跌膊,化行妝set行頭走難這個經典場面,仲有寫信俾Uncle Rain,是抄襲《長腿叔叔》,其他劇情一概不記得。

想不到一開始就咁有娛樂性,溫啤霞、崔簫寶、蔡叉莉三條女性格鮮明,身邊一柞side cast都好有睇頭 : 孤兒院見到鄒靜 (做過細碼王菲),隔籬屋住了余倩雯 (曾經和老公趙潤勤搞創意家族蝕到喊),富家女有梁佩瑚 (心形嘴),和都巿女性麥翠嫻 (佢最轟動的新聞是被指為縮水鋪騙子)。

發瘟撈家一忠一奸,尹揚明聲大大,仲有陰陰濕濕李成昌;甘草又有李麗麗做崔簫寶個貪錢風塵老母,想租間凶宅俾個女和朋友住,那段戲已經笑爆嘴;羅蘭扮反眼癲婆,好明顯是龍婆前身;仲有蠱惑仔和成班撈女...90分鐘坐定定走唔開,這部劇應該是8月最佳笑片。

講番歌,溫碧霞最近出了復刻精選,16首歌,講真我只識《森巴嘉年華》,略記得《水的個性》,當然,最hit的是《火玫瑰》主題曲《海潮》,呢首歌帶點中式配樂,可能是《野花》後遺症,最奇怪到了副歌轉晒tempo,倫永亮好像將兩首不同的歌駁埋一齊,唱死溫小姐呀。

溫碧霞 - 海潮 (1992)
作曲 : 倫永亮 作詞 : 小美


溫碧霞 《海潮 新曲+精選》
出版日期 : 2007年7月26日
出品商 : New Century Workshop (HK)

01. 森巴嘉年華 (後過渡期版)
02. 海潮
03. 曾經愛過
04. 美女與野獸
05. 蒼天不許
06. Baby Don't Go
07. Stranger In The Nite
08. 某一個晚上
09. 半生緣
10. 痴心
11. Boogie Night
12. 水的個性
13. 飛花
14. 希盼得好夢
15. 月亮代表我的心
16. 調景嶺之歌

溫碧霞 - 水的個性 (1992)
請留意2分39秒佢點「ha」。













溫碧霞成長於調景嶺 (已清拆),是國民黨老兵的女兒,因此有《調景嶺之歌》這首咁有本土特色的歌,但我未聽過,有機會找來聽聽先。

走難look


跌膊look

14 comments:

OGAKE said...

以前都無追"火玫瑰",但隻歌就成日聽,"你對我說句也許是緣慳",真係深入民心,尤其係"緣慳"果個走音位,我聽親都笑,仲要扮埋佢走音先至開心......

Fun said...

溫啤霞真係娛圈典堂,跌膊功夫自此一家,唱功更加唔駛講,相信只有美鳳李係佢對手。第一次聽佢唱live係勁歌金曲,佢唱第一張碟既第一首主打『Stranger In The Nite』.. 搏晒命放電,顧得跳又唔顧得唱,走晒音~~ 笑左我幾日!

我記得佢響『地下情』同『停不了的愛』既表現係ok架喎,咩解一做電視變左咁樣?大家記住留意一幕海潮色誘李成昌,都係一絕架!

chi said...

Fun,

溫碧霞同令尊在《地下情》有沒有對手戲?他帶你去睇朝偉,有冇搭單見埋啤霞呢?

前一排見到套戲出了DVD,都有諗過買來重看,只記得在米堆上造愛的前衛鏡頭。

Fun said...

好似有場食飯戲.. 不過我去個日無海潮,如果唔係我會同佢一齊跌膊~

Fun said...

朝偉同金燕玲廚房肉搏都好劇烈喎~~~~

shangri_la said...

> 等《神女有心》開場 ...

Oh I envy you. Are you going to write something about《神女有心》sometimes? I think《山水有相逢》is a better series because there is 黃韻詩 to match 李司棋 (馮寶寶 couldn't quite replace 黃韻詩 and 黃愷欣 even less) but the character 常念奴 is probably one of the most difficult roles on TV of all time and 李司棋 pulled it off beautifully. Personally I think that was the best performance of her career.

Incidentally, 蘇杏璇's character in 《神女有心》, 祥林嫂, is actually lifted off from 魯迅's 祝福. I don't know how did 甘國亮 get the idea to turn a tragic character into a comic role.

Kenny said...

http://global.yesasia.com/gb/PrdDept.aspx/code-c/section-music/pid-1004954517/

大串燒2,今天買了,沒來得給拆。

lemon tree said...

海潮當年嘅作狀演出,堪稱經典,真係睇到全家人都「啤啤」聲。

最印象深刻係,劇情話海潮身世可憐,係一朵落難嘅「火玫瑰」。 但佢就全程扮到成隻雀咁,將把長髮set到靚一靚,d 衫唔係趺膊就襯晒色,毫無草根感覺。 加上佢由頭至尾都保持一貫嘅嗲聲嗲氣,笑樣同喊樣得一個款,變成哭笑不分,認真把鬼。 如果電視有「金草莓」獎,真係好難唔分粒「草莓」俾佢架。

不過講真,我哋個時又真係一路彈,但又一路睇嘅………都幾犯賤吓。

順風耳 said...

我記得呀,溫小姐果次上勁歌唱<Stranger In The Nite>個Look 係大波浪鬈髮配紅色長袖貼身上衣&藍色牛仔小褲褲,條褲個褲管唔知點解好闊的,溫小姐對大腿又幼喎,睇上去好似成條雞乸褲咁(我的袓母係咁形容呢種褲架),佢唱得好似好投入咁囉,扭身扭勢咁,但我除左果句"Stranger In The Nite....乜乜乜乜舊事重提...也無謂!"其他歌詞旋律完全冇印象了!

另外又有一次,都係勁歌,溫小姐呢次唱<水的個性>,成首歌係點真係唔記得了,淨係記得中間chorus 係:"點起(高音)乜乜的火...把我灼灼的燒...." 我的叔父睇住佢唱,然後語帶嘲弄地說:"WeWeWaWa咁,都唔知識唔識唱!"

我覺得<海潮>首歌幾好feel架(但溫小姐唱得又冇feel又唔好聽),唔知如果由Sandy Lam 唱會點既效果呢?
 

Nakaaron said...

溫啤霞另一突點就係心形嘴,塗唇膏死都要成心形.話時話我想睇阿fun既跌膊相多D 喎^^.

快樂的 said...

孤兒院/溫崔蔡三個老死/uncle rain,套劇一開始的setting係好完整咁抄長腿叔叔的。
我仲記得佢聽聞uncle rain來孤兒院後冒雨飛奔出去追車、只見到uncle rain的背影果幕慢鏡,長腿叔叔內都有同一幕,連鏡頭角度都幾乎係一模一樣。(而佢跑步的動作都超作狀!)

將海潮賣去金三角呢d咁絕既橋唔知點諗出黎,印象中好似有成大半集拍住佢俾人凌虐。

劇情又係個d好人奸人全部圍埋都係一家人,好娘,加埋海潮d混亂男女關係同埋窮到死仲日日行行企企身光頸靚,好有岑凱倫feel。

Anonymous said...

溫小姐另1經典係扮識野話
鮑姐拿左金像獎,
佢最中意講英文,不過一味
單字,
口頭禪係我地呢d呃tits!

Agnes said...

李美鳳囉十大中文金曲新人獎, 金銀銅即席同羅文合唱"浪淘沙"...李美鳳Can't let you go go認真囉命啊!

想當年90年代初, 忽然有班做戲既, 個個都湧去做歌手: 關之琳(好似同劉華只係合唱一曲), 劉嘉玲, 袁潔瑩, 李麗珍, 李婉華, 勉強仲有一個朱潔儀...數漏有怪莫怪.

順風耳 said...

哈哈哈,李老鳳<熱愛Can't Let You Go>真係好經典,不論是MV或live,都十分"amazing"!

次次睇這個MV都忍不住要笑!===>>> http://www.youtube.com/watch?v=yZmr29Q3q1I