音樂通信廣告時間 (5)























看過《大開色界演唱會》,我發覺自己只是唱片上的劉美君迷,見她款擺扭腰唱《隔》,我怪她錯誤演繹這首歌,《劉美君》中10軌,《隔》是本人至愛,我理解中的隔=detached,傷感寂寞的情緒,沒理由逃不出色界。

玩情慾也可以無顏色,處女大碟的廣告很簡單,一張黑白out-take做圖,「青春活力大爆發 現代唱片公司 介紹樂壇新寵兒劉美君」,下面列出10首歌名,沒有什麼花臣,靚過魔鬼頭加光環。現在仍被炒碟專家視為賣點的是「西德直刻印片」,首批CD被狂炒,最近SONY BMG推出日本壓製高音質再生CD,西德變日本,不知有沒有拉低炒價。

看1986年12月的廣告才知,《最後一夜》是《省港儷人》主題曲,查看電影資料並無這樣一部戲,唱片上亦刪了這個主題曲資料,有點奇怪。不過,2007年的《性工作者十日談》片尾播放此曲,相隔20年再作致敬。

《劉美君》碟上的年份寫1987年,廣告則寫1986年,查實是在1986年12月最尾幾日出街,她是跨年新人,同期對手有黃敏華。























無錯,又係黃敏華,宣傳口號「會勁力於一身 集勁歌於一碟」,比劉美君的青春活力用了個更有力的勁字。碟中的確多快歌,《魅力》改編《Tokyo Town》,早已講過,《卑鄙》改編Duran Duran的《Notorious》,倒未聽過,上個月的西九live都有唱。























兩女夾一男,同期男新人有李克勤,第一張EP以十九區業餘歌唱大賽冠軍作號召,這個比賽除了出過張學友,原來同屆季軍是阮兆祥,聽過他在Rock-In的歌,我不懷疑他的實力。究竟這個比賽辦了多少屆?還出過哪些新人?























《Music Bus》給較關心音樂文化的樂迷看,初時是周刊,後來改為雙周刊,非偶像雜誌,副題是「每週樂壇通訊Music Business Hong Kong」,約50期開始取中文名《音樂通信》,曾經是我最愛看的音樂雜誌,我手中最舊一期是1986年12月聖誕號 (Issue 30),林子祥封面,那期他在宣傳《千億個夜晚》。



上次講1987年的《花街70號》,美藝班底有陳幼堅和Sam Wong,原來前一張《千億個夜晚》已是相同陣容,兩張封面同樣出色。我比較喜歡碟中第二主打《海誓山盟》,記得同名《花王新姿劇場》中的漁夫男主角靚仔,但中途就遇上海難而死,原來叫做川野太郎,此劇台灣譯名《醬油的女兒-阿香》























許冠傑1986年到尼泊爾八千呎高地拍攝《衛斯理傳奇》時患上高山症,一度傳出死訊,回港休養期間事業停頓了一陣子,主題EP《宇宙無限》成績欠佳。廣告宣傳句語寫得有氣勢,「以人類有限智慧 進入無窮的音樂宇宙」,點給奧運聖火珠峰登山隊和王喜聽。























民歌王子也玩過形象,化白臉默劇妝,手抱自己,嚇人一跳,連袁啟聰也說頂唔住,他提及《留下的雨傘》改編自英國Synth-Pop樂隊China Crisis的《Black Man Ray》,被我朋友改為《留下的乳罩》;另外的《茶花女放假》和《她的名字叫Shanghai》都前衛過頭,廣告宣傳「自成一派」,想和達明一派行埋?他還是唱《陌上歸人》好些。

15 comments:

細階 j. said...

《隔》也是我的最愛啊!林敏怡俊逸的編曲、林敏聰簡單但極富意境的曲詞,還有劉美君點點淒美無奈的演繹,是多麼的配合!這麼多年來仍是一首歷久常新、甚具可聽性的歌曲啊!

黑膠人 said...

劉美君呢隻碟我都好鐘意"隔",佢當晚唱這歌時真係有d感動, 因為呢首歌當年唔係hit歌, 冇想過佢會在廿幾年後唱出來, 唸番起好多嘢.
另外, "淸晨"也是我的至愛. 果晚佢差不多唱晒第一隻碟入面的歌.
劉美君咁多張唱片封面我覺得影得最靚都係最後一夜, 的確靚過魔鬼頭加光環.而家呢隻碟仲有出復黑黑膠.
最後一夜呢隻大碟簡直是經典中的經典.

宣傳口號「會勁力於一身 集勁歌於一碟」.....好正, 我鐘意...haha...
我記得當年劉美君隻"最後一夜" 同黃敏華既"魅力"都播得好爆. "卑鄙"係一首數臭男人的歌, 首歌都ok ga. 我細過時聽黃敏華d歌時唔覺有乜嘢, 但近呢幾年玩番黑膠唱盤, 再買番佢來聽時, 先驚訝發覺原來佢把聲係幾粗獷, 唔知點解以前從來唔覺佢把聲係咁.

chi, 今期的廣告我全部都以前見過呀, 多謝你呀. 而最深刻係民歌王子隻碟. 佢個封面實在太"前衛"了. 同入面d歌好似唔match. shang shang shang hai!

順風耳 said...

  
〔海誓山盟〕套劇我未睇過,但果陣時主題曲MV就一日播幾次,成條片冇阿Lam個樣,全部都係劇集片段剪剪埋埋。
  
最impressive 既係MV尾段有一段好感性的獨白,係TVB配音組自家製作既。
Exact wording 已經唔記得,大慨係以下咁講既:
女聲獨白 (呢個配音員好紅,差唔多套套卡通片都有呢位小姐把聲):
  
戀愛,係人生必經既訪客
佢帶來歡笑,亦帶來傷感
(中間應該仲有幾句,但唔記得)
冇遇過戀愛既人生,係空洞,同寂寞既……
  
去到呢度以為佢完的時候,原來仲有更加impressive既item出現 ===>>>
  
劇中女主角企係懸崖邊,對住個海大叫:“中吉吉吉吉吉吉吉吉……”,然後畫面慢慢fade out。
   
我次次睇完都會學佢大叫“中吉吉吉吉吉吉吉吉……”,hahaha!
 

black lab said...

Oh, 《海誓山盟》&《隔》都係我favorite──原來已經陪伴我超過20年!

Little Sam said...

省港儷人 即 盡訴心中情 Alternate Version。

話說當年 白姐姐 同名電台節目熱爆, 麥SIR 同 蕭公子 即開電影版(1986)諗住撈番筆;怎料午夜場觀眾一見 白姐姐(一樣飾演主持人)就噓到九彩!結果午夜場後急急存倉,並研究如何補鑊 - 據聞其中一個方案乃剪走哂 白姐姐 戲份(齋講 顧美華、李賽鳳 兩母女個故仔)並改名 省港儷人 云云 …

結果 1988 年,嘉禾超低調咁用返 盡訴心中情 個名上畫落畫當了結o左件事;而當年仲係小學o既我,亦冇意慾去睇。 XD

然而家陣做o左港片焚化爐o既我,卻偶然發現o左呢套奇片確實有做o左兩個版,並兩者皆存世!

鉅星出o既 VCD (2000)-
封面竟有劉美君持咪樣,當時疑似搞錯o左(一向舊片 design 好興撈亂相);而片中係有 白姐姐 真情演繹的。

得利出o既 DVD (2002)-
雖然封底 credit 仍然有 白姐姐 ,但係竟然係第二版!一開場已 sync "最後一夜" ,跟住仲勁 - 劉美君親自 mind 咀客串夜總會歌手!!此版本已剪走99%白姐姐戲份(係 ending 有d lung 膊 shot 穿崩冇補拍)

由於呢套片怕且唔會多人睇過,相信唔講未必有人知...而88年係咪以後者作公映版本?亦無從稽考了(當日報章廣告係完全冇落卡士的)。

Fun said...

係我呀~

十九區(第一屆得十八區)應該有三屆,第三屆冠軍叫鄧若嫻,佢參加過86年新秀(唱:跳舞街)架,但係佢贏左之後好似完全無人理咁~ 慘!

ian =) said...

說到「花王新姿劇場」,當年日日陪住我做功課,最厲害是首首主題曲都是經典,「阿信」,「祝福」,「海誓山盟」,「祇可活一次」,「難得有情人」,「心仍是冷」...。

best actor said...

「海誓山盟」原名為「柃櫛」((海上木製的浮標))﹐三木詹士著。「海誓山盟」是一個羅密歐與茱麗葉的故事﹐漁家子弟愛上了醬油廠大老闆小妾的女兒。

魚和醬油本是是分不開的事情﹐然而兩個行業和家族之間的社會地位及教育背景卻是差卻天地。後來男女主角排除萬難終成眷屬。

男主角因一次捕魚意外﹐失蹤海上。女主角苦等數年﹐唯有改嫁醬油廠的新掌櫃。後來男主角被救﹐但失去記憶。最後男主角記清楚一切﹐但為了不破壞女主角的新家庭﹐毅然參軍。the story was kind of soap operatic.

故事和「阿信」及「跳駒」一般﹐表現了二戰前後日本經濟轉型的過程。只是故事最後稍有美化軍國主義之嫌。

當時的川野太郎的確豐神俊朗。
http://japan.videoland.com.tw/channel/mio/img/p003.jpg

d.p. said...

PL的演唱會略為over咗,SK的唔夠放膽去盡.

chi said...

Little Sam,

港產片焚化爐,犀利呀,期待你開個blog,講下被歷史遺忘了的港產片。

Wordy said...

《劉美君》再加七首歌製成的精選 SACD 更好聲,現在炒得太貴。

看《海》台版網頁,怎麼川野(想不到有同好)的樣子跟我記憶中的相差那麼遠?當年覺得他有三浦友和的影子。再看舊劇照,柴田恭兵(後來在《愛情白皮書》演成美老板那個)好年輕啊。

lemon tree said...

劉美君首張專輯的歌曲,始終最令我難忘。 在演唱會上,終於聽到《清晨》、《隔》、《霓虹鳥》的現場演繹,實在既開心又感動,不枉當晚(看的是第1晚)冒著大風大雨濕晒身去捧佢場。

記得林子祥《千億個夜晚》的黑膠唱片,封套是用上「雙面摺合式」包裝,製作得精美,拿上手亦感覺「份量」十足。看得出華納當時對「一哥」阿Lam相當著緊,很肯揼本在他身上。

區瑞強當時期勁玩形象,但就越玩越過火。覺得區生在《她的名字叫Shanghai》EP上的濃妝「大戱」造型比「白臉默劇妝」更恐怖、更令人不安呀。

m said...

to wordy

愛情白皮書演成美老闆的是岩城滉一先生, 不是柴田恭兵

m said...

再續先, 幾年前 nhk 重播 'mio tsukushi' (即'海誓山盟') 果陣有追看 (有線有得 subscribe nhk premium)

最尾結局係阿香(港譯"美香")老公死後, 佢同"物心"吉始終無響返埋一齊, 但博益的電視小說係講佢地響返一齊的, 唔知是否改左結局. 講返川野先生, 佢果陣真係超型, 依家仍然在日本藝能界活躍, 但個樣就跌晒 watt...

Wordy said...

謝謝 m!把僅存的一盒亞視雪花版《愛情白皮書》拿來翻看,把岩城滉一誤作柴田恭兵,除二人(那一期)外型有少許相似外,還有當時香港在播柴田為百佳 (Pokka) 咖啡拍的廣告……