飛圖fan屎31問 (答案揭曉)

轉載自「溫哥華老友記」網站,問題及答案由飛圖fan屎 LTlovePK提供,看見他對飛圖的鍾愛,真係幾cute。
曾參與問答的網友成績如下 :
m@linxism 3題
匿名者 6題半
fun 8題
快樂的 (只答剩下題目) 7題
如對答案有異議,可直接跟LTlovePK聯絡。

http://www.loyaukee.com/forum/index.php?s=6699359b45557cad0abe07c65512b09a&showtopic=25302&st=45


1. 飛圖娛樂有限公司創辦人係 (全名)?
Jimmy Ip 葉志銘。佢既大名已經印晌所有飛圖既CD上面。當年其實有壹週刊以封面人物形式對佢既專訪, 身為飛圖番薯既我當然唔會走雞買返本黎睇啦!


2. 有邊位飛圖歌手身兼飛圖股東?
梁雁翎小姐也 。當年亦有傳梁小姐同阿葉生有路。不過我覺得唔係真既....
梁雁翎晌正式成為歌手之前, 曾經係葉志銘開既「北海漁村」酒家裡面做公關。之後飛圖娛樂成立, 梁小姐就幫手拍KTV做女主角, 所以如果得閒既話, 可以開返D超級舊既飛圖卡啦OK (例如飛圖8001果堆) 都可以搵到佢既蹤影。
(網友Fun提供資料,梁雁翎曾參加85新秀及85亞姐。)


3. 當年飛圖有一位新人未出碟就晌布吉拍MV既時候遇險死左, 佢係?
李家發。出事之前, 李家發曾經同林帆一齊翻唱過「再見亦是朋友」同埋其它合唱作品, 但始終無機會出個人唱片, 真係可惜...


4. 接上題, 佢出既係咩意外?
好似之前講過既, 玩熱汽球/降落傘既時候撞左埋去D石度, 然後溺斃。不過據講佢玩跳傘既時候唔係進行緊工作, 係佢自己趁空檔時候去玩既。


5. 飛圖歌手馮博娟, 第一張亦係最後一張大碟叫做?
「愛得太天真」。可憐馮博娟, 係飛圖首批有同無線簽約既歌手。當年都上過下勁歌、Sunday新地帶既節目, 第一主打《不是擺花街》。可惜跑唔出, 只能做「一碟歌手」。


6. 梁雁翎離開樂壇之前, 晌飛圖發表過兩首歌但係無出碟, 果兩首歌係?
「我和你」同埋「誰也沒有贏」當年呢兩首歌其實飛圖甚為認真製作。「我和你」既MV入面, 梁雁翎仲黎左個突破 -- 唔著上身全部用花鋪住。「誰也沒有贏」既MV拍得相當高水準, 紅色主調, 梁雁翎化身油畫裡面0既人象, 而家拎返出黎睇都唔會太老土, 成個MV拍得好有古典味, 我仲記得梁雁翎套衫好靚。而且首歌好好聽。
好可惜當時正值楊受成收購飛圖既交接期。梁雁翎亦退股。之後大家傾唔成, 梁雁翎亦無心戀戰, 所以離開飛圖。呢兩隻歌最後都無出到大碟。好傷心呀! 呢兩隻歌都好好聽架。
最後只可以晌某張飛圖卡啦OK碟裡面出現.......唉。我好想搵到呢隻碟。
「我終於還是輸掉了愛情你也終於失去了我的心在這驚險的戰役裡...誰也沒有贏」...... :cry: :cry:


7. 講出一首梁雁翎同蔡濟文合唱過既(曾經)大熱歌曲 (超容易啦呢題)。
「慢慢地陪著你走」囉! 當年仲晌地鐵站日播夜播。當年飛圖少數跑出之作。
佢地兩個合唱過既歌仲有「傷過的心可以從來」、「猜猜」等等。


8. 蔡濟文晌飛圖時代既第一張專輯同最後一張專輯叫咩名呀?
第一隻: You're The Only
最後一隻: 獨來獨往
"You're The Only"就有收錄「慢慢地陪著你走」(Track 5), 當年呢隻碟曾經一度賣斷市!「獨來獨往」好好聽, 當年最鍾意裡面既「時間沖不淡思念」。「獨來獨往」出果陣時, 飛圖仲晌無線深夜時段做左個special賣左30分鐘廣告。我當年特登錄黎睇。


9. 講出飛圖晌無線既音樂節目名 (凌晨時份)。
「飛圖雷射卡啦OK流行榜」, 後尾改左名做「飛圖卡啦OK流行榜」(仲有個新片頭同新片頭音樂) 其實飛圖晌亞記每日星期一至五 5:30 - 6:00仲有一個「飛圖Music Video流行榜」


10. 講出飛圖晌衛視中文台既音樂節目名 (週末)。
「飛圖音樂網」 。只有國語歌, 因為牌照規定衛視唔可以有廣東話廣播。但我呢個飛圖迷都照殺。


11. 李樂詩本來係「創意家族」(前身「永高創意」)既歌手, 點解隻碟會俾左飛圖出架??
當年李樂詩已經將隻碟錄得七七八八, 但「創意家族」突然間倒閉。有同「創意家族」合作開既飛圖, 老闆葉志銘覺得好可惜, 於是連人帶歌將李樂詩簽左過黎, 搞掂好之後再推出「感動你」。結果大熱。


12. 李樂詩晌飛圖出左《感動你》之後果隻碟叫咩名呀?
「吾愛被愛」。其實呢隻碟都唔錯呀, 劉德華填詞, 李樂詩作曲既「夢醒好嗎」超正! 雖然我唔鍾意劉華...


13. 講出蔡興麟晌飛圖時代既一首歌啦。
「為了你為了我」。
(i still remember按 : 蔡興麟好似係Sony,印象中冇簽飛圖喎。)


14. 馮博娟同彭建新(!) 合唱過一首歌架, 首歌叫咩名呀?
「過去已成過去」。一男一女, 一個佬一個0靚妹, 一個唱廣東話一個唱國語, 都幾搞笑。


15. 一首由新少年俱樂部 (NBC) 原唱, 最近被某台灣歌手翻唱成大熱歌曲既歌...叫咩名?
「當你孤單時會想起誰」 。真係估都估唔到10年之後會有台灣歌手拎返出黎唱。仲要無人記得當年係NBC唱, 仲當係新歌。


16. 「管它甚麼的安排」係邊個唱架?
咪就係「新少年俱樂部」囉。當年勁鍾意。
「關於我的未來 誰在安排他們說這命運是無法更改古老的話 在這個時代迷惑著我的心海」....


17. 講出兩首黃凱芹晌飛圖時代既兩首歌啦。
「平常心」「自製浪漫」「少了你一個」「其實你想不想我走」「傾心」..等等。


18. 黃凱芹同李樂詩都有合唱過架, 佢地隻歌叫咩名呀??
「愛火重燃」


19. 「創意家族」既張智霖同黃凱芹又有cross over合唱喎, 首歌叫做?
「笑話」


20. 梁雁翎晌香港既唯一一場個人拉闊音樂會入面, 曾經用unplugged方式唱過一首歌, 果首歌係?
「浪漫故事」 :thumbsup:


21. 梁雁翎「對你的思念總是特別的深」既MV, 背景係乜野?
假沙灘呀! 裡面仲有架車! 梁小姐仲要扮發脾氣晌度踢架車(講到架車死左火唔郁) 。


22. 「離開...陌生的城鎮。忘記...所有熟悉的人。」呢兩句歌詞出自邊首歌 (國語)?
咪就係「對你的思念總是特別的深」囉!


23. 趙學而晌首張EP入面, 「反叛情歌」之外既一首快歌叫咩名?
「很清楚」


24. 一首由黃品源作俾梁雁翎既歌。
「若是你真想分開」。呢題係幾難既。


25. 梁雁翎唯一一首上過「勁歌本週冠軍歌」既歌。
「不應該的愛」。正!


26. 飛圖晌衛視中文台既音樂節目, 曾經有一集為中秋節搞左個special, 個special節目名係?? (難度: ★★★★★★★★★★★★★★★★★★★★, 我睇連當年上過去個節目既歌星都未必記得)
「中秋情懷浪漫之夜」
哈哈哈。當年一班飛圖歌手總動員上去個節目度講下中國唔同各地既月餅有咩唔同。上海仔蔡濟文仲話上海D月餅係鹹既... 馮博娟就話香港有隻「新產品」叫「冰皮月餅」(當年真係0岩0岩出架咋)。 :laugh:


27. 梁雁翎當年有首歌成為大陸「菱高空調」既廣告歌, 果首歌叫做咩呀?
「感激清風」
「長...夜...裡...清風輕輕敲動內心不懂再響的鐘...清清的風聲逐漸軀散心中那冰凍感激清風吹來慰問感激清風的抱擁....Ha...美麗感覺 在心中送...」


28. 梁雁翎當年曾經為藝術犧牲, 晌某首歌既MV入面以短髮形象示人, 果首歌係?
咪就係「不應該的愛」囉! 其實個MV真係拍得唔差。


29. 曾經幫容祖兒作過「我的驕傲」既陳光榮, 幫蔡濟文作過邊首歌呢? (難度: ★★★★★★★)
「時間沖不淡思念」


30. 「今夜」、「願我是孤單中你哭泣的背影」呢兩首歌係邊個唱架??
林帆


31. 陳圖安上場之後, 飛圖有一句慣用既口號, 果句口號係? (難度: ★★★★★★★★)
「若然感動 與我同行 飛圖音樂」

10 comments:

Anonymous said...

我都記得蔡興麟係sony架喎,而為了你為了我就係佢第一首派台歌,時為91年9/10月左右..

另外想補充一點,林帆曾經參加86年電視小姐,編號為6號!其後更成為TVB的青少年大使..

Anonymous said...

sorry係5號先岩..

Anonymous said...

雖然我都好鍾意"不應該的愛",但係其實佢舍mv係抄Madonna嘅 "Rain".

Anonymous said...

以前無線深宵成晚播林帆小姐嘅MV!

馮博娟除左唔紅, 亦有報導指佢患上厭食症. (但印象中馮小姐面容身型幾豐饒, 唔似有病)

講到飛圖, 仲有葉玉卿..."擋不住的風情".

Anonymous said...

《誰也沒有贏》呢隻歌當日響隨YES附送既CD入面有架~~同CD仲有黃凱芹 少了你一個, 趙學而 反叛情歌... ...一下子唔記得左隻CD攝左去邊添~~搵番即刻同大家分享呀~~

Anonymous said...

regarding #6. "我和你" and "誰也沒有贏" were released together in an album called "心甘情願" in China.

Anonymous said...

我是用 google 找到你的網站..

你講漏左 (豹小子)
90 年代第一對男子組合!!
我仲有好多飛圖資料,可以e-mail我
e-mail 係 alankoon at gmail

獨家問題

1. 梁雁翎歌迷會入會幾錢一位
2. 梁雁翎 MTV (慢慢地配著你走)
係邊到拍攝?
3. 香港版梁雁翎 (離開那個不愛你的人)
是乜色封面 ?
4. 舊朋友係邊個唱 ?
5. 史上最長的歌名係邊個唱?
6. 飛圖音樂雜誌,有邊個做 VoiceOver ?

Anonymous said...

4. 舊朋友係邊個唱 ? 蔣志光
5. 史上最長的歌名係邊個唱? 彭家麗
6. 飛圖音樂雜誌,有邊個做 VoiceOver ? 梁雁翎

Anonymous said...

1. 梁雁翎歌迷會入會幾錢一位 $100(以前我係會員)
3. 香港版梁雁翎 (離開那個不愛你的人)
是乜色封面 ?白色
4. 舊朋友係邊個唱 ?蔣志光/韋綺姍/張智霖/許秋怡/黃寶欣/甘子暉

Anonymous said...

「若是你想真的分開」唔係黃品源作俾梁雁翎架喎,只係翻左黃品源隻歌變成廣東版,原曲係「縱然有一天我們分離」,以前飛圖音樂節目間唔中都會播呢歌架!!