未來偶像 已成過去

剛寫了甄楚倩,就看到新鮮上載的《未偶》片段,她和張立基在1988年做表演嘉賓,我記得那年冠軍是廣州人李達成,他同年在華納出了一張大碟《再一次》,仆到阿媽都唔認得,很快就蒸發了。

甄楚倩 - 無伴的舞 & 張立基 - 心跳 (1988)
頭兩屆冠軍出道一兩年,分別出過EP和大碟,已很有大將之風,兩個唱快歌都甚有台型。


另外又找到張立基的得獎片段,原來他是喊包,我記得他被葉玉卿飛時哭過,發霉上《大平反》時又哭過,肥媽同情他簽為旗下藝人;初出道得獎時咁應該激動,更加哭到伏在獎品車上。

張立基 - 偷心者 (1986)
第一屆《未偶》,黃韻詩、曾志偉、米雪做司儀,張立基得到一大一小獎,同屆得獎的有黃衍濛、區耀國。雖然他開始時哭到甩拍子,但最後的轉體做得幾型,唔怕認了,我以前鍾意過張立基的。


張立基 + 關淑怡 + 杜德偉 + 草蜢 - 台慶勁舞表演 (1990)
我錄的台慶節目,那時張立基剛跳槽無線,TVB喜歡安排他、杜德偉、草蜢鬥舞,加埋關淑怡扮美人魚,非常好看。


其他未來偶像參賽者 :

區耀國 - 勁度Rock 'N' Roll (1987)
得獎後簽EMI,出過一張碟咁大把,他這首主打歌歌詞幾騎呢,咩「舞起張關刀」,認真大整蠱,是一首男人唱的搖擺西歌,類型較少見;而且同公司有另一rock友吳國敬 (新秀出身),兩個只能揀一個,阿耀被叮。


黃敏華 - 挑戰 (1989)
也是第一屆參賽者,之後和張立基、區耀國一樣簽EMI,勁過一排,rock得嗌得,這首1988年南韓奧運亞視主題曲頗hit。在《民主歌聲獻中華》,她被岑建勳形容為青春派歌手。


寶佩如 - 飛 (1989)
1988年參賽,翌年簽EPIC (Sony旗下label) 出過一張EP一張大碟,這首快歌有甄楚倩影子,但因受外型限制,巿場完全唔受;後來留在亞視做了多年藝人,印象中有幫劇集唱主題曲,但好像沒有出碟。


寶佩如 - 請先掛號 (1989)
一會兒似甄楚倩,rock得來又像黃敏華,風格都幾飄忽,這首好明顯是西歌。


梁雁翎 - 像霧像雨又像風 (1991)
飛圖女王,參加過亞姐,又參加過未偶,結果認識了葉志銘後,入飛圖做了一姐,即是容祖兒的大師姐。她剛出來時,我覺得她似未脫娘味的劉嘉玲。


袁鳳瑛 - 滾滾紅塵 (1991)
我不知她哪年參加未來偶像,《天若有情》90年hit爆,但紅歌不紅人,後來她簽音樂工廠,在羅大佑、林夕的打造下,不乏佳作,我也買齊她3張碟。


袁鳳瑛 - 戲迷情人 (1993)
監製放心讓她改編陳淑樺黃鶯鶯,對她很有信心,其實她把聲有點戲曲腔,不太多人受到,我比較鍾意曾作主打的《為未來回憶》。


蔡濟文 + 鄭伊健 + 鄭敬基 - Home Alone (1991)
蔡濟文1988年參賽,1990年做新人,簽BMG,改編《你怎麼捨得我難過》的《永遠最愛你是誰》hit過,還有《美麗的謊言》。他來自上海,而且眼細、白白淨淨,高音甜假音靚,被稱為「小呂方」。


譚又銘 - 終於找到Love (1991)
這首西歌笑過好多次了,被軟硬改為《終於找到笠》,亦間接孕育了《點解要大家笠》。88年參加未偶,91年簽日本Victor (JVC旗下),全港沒有一位歌手簽過這間唱片公司,對於崇日的港人來說算威喇。


1993年冠軍 : 田蕊妮
沒有出過個人唱片,反而老公杜汶澤被黎明看中,出過一張爛碟,據聞只賣了100張。

16 comments:

Anonymous said...

可以的話,好想睇番個比賽。
張立基,甄楚倩的碟我都齊哂。
老實講,如果係新秀,兩個未必會贏。
又或者等幾年先有碟出。
兩個的進步空間都很大,所以後來都要簽無線。亞記又一次開埋個井俾人飲水。

都唔知係咪做馬,第三屆個冠軍......
所以"未偶"都摺埋。亞記再沒有歌唱比賽,甚至歌唱show。

區耀國,餅帶我仲係度,聽過幾次。
無計,吳國敬同佢,都無得揀啦卦?

黃敏華,唔知點解咁快消失。
其實未比賽時,已出過民歌(CBS),
有一兩隻 hit 歌。
所以當年無贏,我覺得怪。
或者當年她唱"把歌談心"(林姍姍),
不適合佢唱。查實佢唱 rock 歌,快歌好掂。我覺得唱片公司 EMI 不敢冒險。
佢同區耀國唱"好想你留下" 好聽。

寶佩如-出道那年新人太多,無計。
那隻她唯一的LP,不算太差。
我最愛那隻 side cut "討好"。
某年,亂馬1/2 主題曲是男人唱的,劣評如潮,寶佩如唱番,當堂大家順哂。
近幾年佢有唱亞記的主題曲,其實唱得不差。
初出道唱 rock,個 image 嚇死人。

By the way, 香港唱/扮唱 rock 的女歌手都不太掂。黃敏華,寶佩如,陳雅雯,甚至陳潔靈。

袁鳳瑛 - 同筆者一樣,買齊三張碟。三隻都鍾意。最愛"一個你,一個我"。

Wordy said...

唔使怕醜,我果時都幾鍾意張立基同甄楚倩。

袁鳳瑛出道時,我還沒正式買唱片,現在已經找不到了。心水歌曲:《寂寞是》。

Nakaaron said...

有冇人知張立基去咗邊?如果佢同甄楚倩一齊攪紅館演唱會,我都肯定會去捧場!

Ogake said...

估不到也有朋友喜歡"袁鳳瑛",我也有齊她的大碟呢,以"戲迷情人"大碟最精采,我最愛"你是我的意義"。沒有收錄在個人大碟的,則以"情人眼裏"及"仙樂處處飄"最好聽。滾石待她算不錯,第二張大碟先plug了歌,再讓她去美國讀聲樂,回來才錄埋隻碟,所以第二隻碟由first plug到出碟都隔左好耐。她也有過幕前演出,好像是"壹號皇庭",演出強姦案受害者。

masahiko said...

其實張立基也有好多好歌,例如有(自焚),(妳好嗎),(盼你此刻奔向我)....到而家久不久我也會專登從i-pod中選出來聽

另外寶佩如,其實我很喜歡她的第一張LP(亦是唯一一張),特別是主打歌(結束)同另外兩首(夜深情),(無緣者),最近有朋友幫我由黑膠轉做cd,再聽番,感覺其實當時來說選歌是不錯的,可惜寶佩如唱功實在平庸,又沒有突出鮮明的形象,難怪只做一碟歌手

Anonymous said...

講開張立基, 之前在 tbb 收費音樂台重播某年區局節音樂會表演, 有黎明詩伴舞, 係響個籠裡面猛跳, 當年 stephanie 仲未出道~ (不過無錄低, 唔記得乜歌)

Ogake said...

應該係"異性相吸",隻歌係由黎明詩"rap"的(快過讀白,慢過rap的"rap")。

Anonymous said...

I remember 安德尊 was also from "未偶" 1986, he sang "STAND UP", but performance was terrible.

Anonymous said...

第一屆『未偶』個show,搞得頗有娛樂性。 最記得係黃韻詩同曾志偉台上互窒,挖苦論盡娛圈的八卦事,幾尖酸抵死的。 感覺佢哋似做緊楝篤笑,多過似係歌唱比賽嘅司儀。

提起『未偶』,最有印象始終都係張立基同甄楚倩,佢哋當年有過不少好聽的歌,我亦相當喜歡。

個人覺得張立基的改編歌,很多都選得有水準和別具眼光。 『心跳』、『妳好嗎』、『I like it』均屬此類佳作。 『妳好嗎』更令不少人對佢刮目相看添,我當時甚至覺得呢首歌,絕對是有資格成為年終金曲的。 呢張碟內,除咗『妳好嗎』外,當年亦愛聽『愛人講再見』和『再見女郎』。

甄楚倩的聲線偏低沉,啱唱有風霜味的歌。 新力幫佢選上改編山口百惠的『深夜港灣』作為首隻主打歌,實屬明智,難怪首歌會反應不俗。 除咗關淑怡外,張偉文都翻叮過呢首女人歌。

响新力中期嘅『今天天氣呵呵呵』,亦都算幾hit。 我當年有過呢張黑膠碟,愛聽碟內一首林敏怡作曲、調子輕快爽神的『少女心』,成日覺得首歌好鬼似Madonna隻『True Blue』(廣東版係葉蒨文嘅『衝動』)。

Ogake said...

唔講唔記得,一講就諗起"安德尊"那年係得到"最突出台風獎"的,我記得佢跳到好誇,癲晒咁,唔俾佢都唔知俾邊個~ 

Fun said...

哈哈.. 我都係鍾意張立基架喎.. 實在我覺得佢ok靚仔 lol~

第一屆未偶印象好深,亞記擺明大搞,當時新秀仲響伊館,未偶已經去紅館,我記得陳友仲嘲諷個台既set up似少林搭棚大師(因為好多棚架)。

張立基其實第一隻碟都幾爛架,個封面好驚,化左個梅艷芳既裝,第一主打叫《急行夜車》,第二主打叫《黑領呔》。不過一到《自焚》EP就hit起上黎!佢好聽既歌好多,唔好講快歌,慢歌都好多選擇,例如:《盼你此刻奔向我》、《妳走了》等等.. 其實佢個陣去到二線頭架啦,無啦啦做咩會咁既呢下?

區耀國準決賽既時候留有一頭Danny Summer既長攣髮,好驚,到左final就俾亞記剪晒!佢唱《空凳》,唱到青筋暴現.. 哇首《勁度rock n roll》真係.. 呢d歌真係唔多可以響收音機播呀..

黃敏華響未偶初賽係唱《我要》,俾評判話唱功雖好但表演過火。決賽唱《把歌談心》個part係指定歌曲黎,自選歌應該係《冰山大火》。

黃衍濛被指係小成龍,後尾拍過幾套德寶既戲,出過碟。第一屆仲有個中日混血女參賽者叫百美蔚,決賽唱《夜之節拍》,唱得ok但舞姿騎呢..

袁鳳瑛其實係參加86新秀(唱放縱)之後先參加未偶,唱《灰色化妝》(佢應該係蓮迷喎).. 除左《天若有情》,我仲鍾意《吉卜賽的情人》。

李達成當年港台幾撐,十大中文金曲仲入到最後5強架。第三屆未偶仲有PP Gals個位袁麗麗,出唱既時候被司儀話佢個名讀起上黎似“軟賴賴”..

Ogake said...

阿Fun,你記得咁清楚既,係咪有錄低呀?

Nakaaron said...

乜佢吾係名DJ泥咪?所以先咁清楚化^^

Anonymous said...

勁呀!!! 好開心見到呢篇post!!
我都幾鍾意張立基,甄楚倩!!不過當時讀緊小學, 屋企無錄影機, 無copy!!

好彩你呢度睇得返!! yeah!!

我都知道寶佩如(寶珮如)出過碟, 黃色封面架!!以前圖書館有cassette 借! ^o^

Anonymous said...

真係好渴望可以重溫未來偶像爭霸戰,我當年好鍾意甄楚倩架,不過後來拍咸片就改觀了,
同埋當年都袁麗麗亦都令我很難忘.
呢 D 回憶好正~~

ms818 said...

我反而睇到原來袁鳳瑛個mv主角原來係林家棟~~:D