好時代廣告時間 (3)























娜姐新大碟《硬糖》剛推出,21年前,她宣傳的是電影《Who's That Girl?》,戲是仆了,但主題曲登上Billboard冠軍。這裡賣的是12吋Maxi Single,2個混音+來自《True Blue》的《White Heat》,廣告底的華納logo值得懷念,她2009年便正式告別老巢。當年華納的宣傳大員缺乏創意,「勁歌熱舞 魅力四射」,雖然是拉丁節奏,但Madonna在MV只臨尾轉了幾個圈,何來熱舞?

Madonna - Who's That Girl? MV (1987)


Beyond三子現在仍僵持在小器的意氣之爭,黃家駒逝世15年,不知能否瞑目。1987年7月,五人時期的Beyond (後右為88年離隊的劉志遠) 推出第一張大碟 (之前出過1餅盒帶2張EP),騎呢形象由亞姐潘銑儀設計,披披搭搭扮亞拉伯油王,睇番廣告,封面飛赴新加坡拍攝,甜蜜星馬印假期及Holiday Inn Park View Singapore贊助。這張唱片由鍵鋒Kinn's出品,編號KNI-1,一元伊始,後來Beyond不滿鍵鋒發死人財,多次對簿公堂。























Beyond - 亞拉伯跳舞女郎 @ 超越亞拉伯演唱會 (1987年10月4日)
























陳慧嫻在1987年2月的《變變變》大碟聲勢下跌,7月暫以《Remix+精選》偃旗息鼓,是但到用歡樂天地廣告照做封面,瞪眼張口表情和大蝴蝶頭令人「驚」喜,這首廣告歌寄調《貪貪貪》,度身訂造又唱又玩,她在《志雲飯局》講過,酬勞不過幾萬元,多謝晒太古城歡樂天地。

陳慧嫻 - 歡樂天地廣告 (1987)


下圖咁多首remix,是我的搜尋名單中的most wanted,黃敏華兩首混音比較易找到,因後來有推出復刻3吋CD,看她在宣傳中的位置,是當時的EMI一姐。























夏天是唱片公司remix大戰時間,迎戰百代《Ice & Fire Mix》的是新力《Mix Up Remix點指星Sing 12"》,從這個廣告看,初版大碟沒有《發熱體Remix》。巧合的是,雷安娜有首《生活影印機》(上),林志美就有首《時光影印機》(下),蘭克斯樂碰理光,可以約埋班西friend : 陳美玲《愛情拖拉機》、劉美君《午夜傳真》、張國榮《愛情離合器》一齊勁jam。























這種玉郎漫畫式的電影廣告,曾流行一時,梅艷芳膽拖草蜢仔,曾志偉膽拖開心少女組,卡士工整,底部細字寫,電影主題曲《將我送給你》,是1987年夏《梅艷芳 (似火探戈)》大碟的第一軌,又稱《序曲》。

10 comments:

小奧 said...

好時代有一期送過透明黑膠single好似係beyond,薄到好似張紙,你有冇印象?

LBST said...

EMI Ice and Fire Mix 同點指星聲是同期的嗎? 忘記了。隻星聲CD版曾經炒到超過一千。好驚嚇。可能佢有多幾隻歌。
好想 Ice and Fire Mix 有復黑。
唯有等有心人將隻碟放出來。

黑膠人 said...

哇, 好正呀又有廣告睇, 以前細過時好鐘意睇呢d唱片廣告.

P.S 我好想聽番雷安娜首"生活影印機"呀....天是未盡亮床燈亮....影印機影印早餐wee oh wee oh....天天罰企車站....休息是最舒服......

chi said...

小奧,
我買過一期送薄透明single,但不是Beyond,是Brother Beyond,當年的偶像boy band,不知是否你講的同一期。
唔知是否可以播呢?等我搵下仲有冇在床下底先。

黑膠人 said...

chi,

講開brother beyond 呢隻細碟, 我都好似有印象喎, 你地個隻隻碟係咪軟身?

我其實唔記得點解會有呢隻碟, 只記得係買d乜而送的.

chi said...

冇錯,係軟身透明的,是不是印來做宣傳品周圍送呢?

ricky said...

果期 "開心少女組" 乜唔係 (張太 + 厭食瑩 + 肥師奶細妹)咩? 安橋水小姐好似應該從來都唔係少女組member 喎。

littleoslo said...

haha brother beyond? 我諗你地應該對,我只記得好薄好薄

chi said...

ricky,
「開心少女組」在不同時期有不同成員,入過隊的有羅美薇、陳加玲、袁潔瑩、羅明珠、柏安妮、李麗珍、何佩兒、林穎嫻,這個電影廣告中細字寫明「開心少女組」,應該冇錯,相信1987年時期有柏安妮。

Anonymous said...

我記得開心少女最初是陳加玲,袁潔瑩同羅美薇喎,後來羅小姐離開新藝城過檔德寶,加入林穎嫻及何佩兒,不過是出碟時的陣容,唔知是咪電影又有唔同組合呢