林憶蓮呢？可以話分兩頭，計樣的話，我覺得吳倩蓮有點像，早兩年修身堂減肥真人騷有個參賽者，都好似。
如果計聲線，起碼必先苦練氣聲+假音吐納，呵氣如蘭，才略有其神髓，黃耀明曾說憶蓮創立了一個Canto-pop的school of singing，以下可以撥歸蓮教女弟子 (雖然僅限某些歌曲)。
蔡立兒 - 生死約 (1992)
作曲 : 中島美雪 作詞 : 林夕
蔡立兒和憶蓮同屬華納，由林子祥帶大，但唔似沙莉。她在《憶蓮1991意亂情迷》演唱會被徵召入「好朋友合唱團」(即和音團)，同團有彭羚、區新明、雷有輝、雷有曜、周小君。近朱者赤，去到92年她開始似憶蓮，《生死約》中國風跟貼《野花》，勁唱氣聲，曲風唱法仲有MV化大戲妝，都係向蓮偷師。
唐韋琪 - 飄戀 (1992)
作曲 : 陳耀川/陳樂融 作詞 : 周禮茂
原名彭美鳳，ATV未來偶像落敗後，咁好彩簽到寶麗金，唱片監製是許願 + 趙增熹，直頭係憶蓮班底，加埋一對鳳眼，中國味的《飄戀》派台時，郭啟華猛話係小憶蓮。可是紅出來的是《長腿叔叔》主題曲，她一碟玩完，《夢中天使》帶挈她去做兒童節目主持。
蔡齡齡 - 解脫 (1990)
作曲 : 馮鏡輝 作詞 : 潘偉源
擺到明係憶蓮粉絲，在商業一台做節目常播憶蓮，在《100分》column又成日讚佢，在EMI出第二張唱片《The Simple Life》時，直頭搬憶蓮模式做碟，改熱帶拍子的《Lambada》做《人生嘉年華》，慢歌搵憶蓮舊男友監製作《解脫》，亦練出氣聲，聽講佢後來仲嫁埋俾馮鏡輝。
梁詠琪 - 北京之夏 (2006)
作曲 : 張亞東 作詞 : 陳少琪
亦是憶蓮粉絲，假音可能都係自學於憶蓮，但因over，搞到令人受不了。她一直翻唱甚多憶蓮歌曲，如《下雨天》、《破曉》等，直到近年有首《落難皇后》，逼真程度甚高，2006年《北京之夏》，連蓮迷都會認錯憶蓮唱。張亞東為憶蓮作了首悶爆的《有淚盡情流》，我一直耿耿於懷，如果這首《北京之夏》是憶蓮唱，我一定會勁鍾意。
泳兒 - 黛玉笑了 (2007)
作曲 : 翁瑋盈 作詞 : 周耀輝
其實泳兒應該是翻版王靖雯 (唔係王菲喎)，但這首歌又帶點憶蓮味，可能因為唱葬花，令人想起《再生戀》，或者可以說是蓮菲混合體。
謝安琪 - 十七度 (2008)
作曲 : 馮家俊 作詞 : 周博賢
刻意營造90年代初Canto-pop慢歌味道，謝安琪是憶蓮歌迷，順理成章變了致敬版《微涼》。
[快歌環節]
蔡立兒 - 獨身女郎 (1992)
作曲 : Ami Ozoki 作詞 : 周禮茂
又係蔡立，呢首係《三更夜半》姊妹篇，都巿女郎效應，連題材也一樣。她有首《過界》，改編Anna Banana，聽講憶蓮原本想改，後來唔知點解又冇，落入蔡立兒手中。
黃寶欣 - 貼身情人 (1990)
作曲 : Babyface/L.A. Reid/Daryl Simmons
《一分鐘都巿一分鐘戀愛》的細妹，一齊在美國出世，來到香港失散了，所以眼耳口鼻像餅印。
蔡齡齡 - 花光它 (1990)
作曲 : 倫永亮 作詞 : 周禮茂
押個「悶」字韻，都係《三更夜半》姊妹篇，唔講情慾講shopaholic，更加貼近都巿女郎心態。倫永亮作曲編曲，南美節奏，應該係指定抄《逃離鋼筋森林》個款0黎造。
