莫少聰 - 還是愛妳 (1993)

主打歌 : 玩肚餓、其實我還是愛妳
93年行無厘頭路線的樂壇男新人，大眼仔莫少聰，推出首張廣東大碟《還是愛妳》，亦是唯一一張，他在台灣出過數張國語專輯，但廣東碟只有一張咁大把，主打快歌《玩肚餓》歌名令人印象非常深刻，楊振龍作曲，因葵填詞，甘志偉編曲，是一首電子跳舞歌，加入印度中東world music音樂元素，迷幻神秘，極之玩嘢，莫少聰仲排晒中東舞，如果由草蜢演繹，分分鐘hit得起，可惜莫少聰唱功屬於有限公司，喉嚨像有東西塞著、唔開聲，慢歌主打《其實我還是愛妳》沒有給人留下印象，他在香港只出過一張碟就玩完，留下這首cult song/膠歌《玩肚餓》，跟多年後古天樂《今期流行》屬同系難忘勁歌。這張CD值得一讚的是照片和art work幾潮幾好睇，而且還有推出MD版。莫少聰早在80年代在影壇已闖出名堂，眼大大幾靚仔，印象中時常和劉德華拍住做戲，代表作是88年清裝的《中國最後一個太監》。可能因為憑著港產片的知名度，他在台灣頗受歡迎，兼且出埋碟。他在香港簽的唱片公司是藝能動音，由藝能娛樂公司在93年成立，較早前由89年到92年，藝能與寶麗金合作開設寶藝星唱片公司，旗下曾有劉德華、吳婉芳、何寶生等歌手，寶藝星在92年結束後，藝能獨自成立藝能動音唱片公司，莫少聰是旗下第一個歌手，93年藝能動音推出的梁朝偉國語碟《一天一點愛戀》大hit，他繼而回歸香港樂壇，94年香港新人有古巨基、陳山葱 (那時他未改用「聰」) ，而李克勤、劉德華亦在稍後時期加入。莫少聰多年後與女星洪欣相戀並誕下一子，兩人沒有結婚，莫少聰後來在北京因藏毒被捕。