扁扁的影子





















Yesasia將唱片封面橫放了,這張玩神秘的照片很抽象嗎?不明為何橫直不分。

不過不要緊,橫看豎看,周影都不是一張叫人難忘的臉,從沒被重視過,就是那麼一個扁扁的影子,在全港最大的唱片公司斜斜躺著,《寶麗金傳》也沒有把她編進去,想不到肯替她出復黑。

寶記有三小花,劉小慧黎瑞恩湯寶如,加埋姐級的周慧敏關淑怡,出過《美少女宣言》系列精選,但同期的周影硬係冇份,不算靚,又不算特別唱得,位置尷尷尬尬,我不記得寶麗金為什麼簽她。

有人話她帶點鄉音,用來對付勁敵飛圖的梁雁翔,我又唔覺,Annie梁小姐娘氣迫人,阿Shadow Chow脫掉了土味,咬字不正還挺有趣,聽她唱「寂寞」兩個字,兩個k尾都唱不準。幾首主打歌都幾K,但不及梁雁翔咁深圳K場,起碼我年少時聽得入耳。計包裝,她第一張碟 (《甚麼時候我們再見?》) 美術效果似關淑怡,第二張碟 (《還仍然想我嗎》) 半遮面,感覺高檔啲啲,飛圖的A&R同寶記冇得揮。

對周影認識很少,只聽聞她和梁繼璋拍過拖,出了兩張唱片後,因普通話流利,去了Channel V做VJ,和李浩林同期。根據歷年樂壇新人蒸發實錄 (1989-2005),她十年前已經結咗婚,嫁給演藝教書的鬼佬,住在discovery bay,個仔大概七八歲。

周影 - 還仍然想我嗎 (1991)
作曲 : 紀宏仁 作詞 : 卓陪
先出復黑的是第二張碟,這是主打歌,最記得這個卡拉OK MV,幾個大隻佬伴著她搖搖擺擺,不知現在加州紅還有沒有得唱呢?我鍾意這首歌的節奏,唱K喜歡唱到結尾的「日出日落也想我吧」,變高音是男唱女歌的演嘢位。


周影 - 秋的碎片 (1991)
作曲 : 陳國平 作詞 : 周禮茂
這是呂珊《3650夜》的姊妹作,兩首歌的作曲作詞名字一樣,陳國平是浸會音樂系教授,本港古典結他大師,90年左右參與流行曲創作,以《3650夜》參加第八屆CASH流行曲創作大賽,得到冠軍,這首歌是深宵音樂節目常客。其後,他為周影作了這首《秋的碎片》,結他聲同樣悅耳動聽。


呂珊 - 3650夜 (1991)
作曲 : 陳國平 作詞 : 周禮茂


周影 - 讓我愉快愛一次 (1991)
將鄧麗君《我只在乎你》改編粵語,先天性一定不及原曲,沒辦法,那時小鄧未作古,原曲已是經典,實在碰不得,廣東詞和編曲又普通,沒吸引力。鄧麗君唱過國語日文,我倒願意聽聽她唱這個版本,歪音更可愛。


還仍然想我嗎? (復黑版)
出版日期 : 2007年6月6日

01. 讓我愉快愛一次
02. 還仍想念我嗎
03. 為何愛上你
04. 野性呼歡
05. 吉卜賽情詩
06. 應不應該
07. 夜正央
08. 美麗的錯愛
09. 秋的碎片
10. 為這夜喝采

周影 - 甚麼時候我們再見?
她的第一張碟,還未出復黑。












周影 - 情路茫茫 (1990)
作曲 : 盧東尼 作詞 : 向雪懷
周影第一首派台歌,廣東話發音最唔準,「站」「立」「在」「不」「知」「方」「向」「的」「路」「上」,個個字都是挑戰。我幾鍾意情路茫茫這四個字,寶記MV真的在一條郊外馬路上拍,以前唱K唱過很多次,應該是周影最hit的一首歌。


周影 - Go Go Away Boy (Indoor Mix) (1990)
作詞 : 于光中
第一張碟的second plug快歌,remix版收錄在1991年的《不一樣的感覺》,只記得她戴有邊帽plug這首歌,和關淑怡唱《星空下的戀人》雷同。

4 comments:

Ogake said...
This comment has been removed by the author.
Ogake said...

呢兩隻碟我都有,但唔知出左復刻,但係第一隻碟好聽D,"痴痴地等","GoGoAwayBoy","背影","某個秋天"都好好聽,我記得"情路茫茫"當年好hit下,電台都幾播呢隻歌架!睇過某本所謂既音樂雜誌話第一隻碟就已經叫做《甚麼時候我們再見?》好唔"老黎"渦...... 第二隻碟既"還仍然想我嗎"我去K都唱過,幾個大隻佬裸住上身,下身單車貼身褲,真係幾誘人,哈哈~~呢隻歌後來江希文都有一首,叫"心掛掛",收錄於佢第一隻碟"舊情綿綿"當中,唱得無Shadow咁好,"為何仍心掛掛,為何仍感睡意未濃~~",隻碟唔知攝左去邊,打住呢句副歌先~

Anonymous said...

回憶忽然又飄回十幾年前......
記得有晚周影上勁歌金曲唱〔還仍然想我嗎?〕(唱live架,冇咪嘴),身後有兩名型男dancers, 其中一個係陳小春,另外一個唔記得了,但再睇番應該會記得叫乜名,那時覺得兩個哥仔好似樣,我uncle仲問佢地係咪孖生兄弟,我竟然答佢:係!(hahaha....)
然後佢又笑周小姐唱"日出日落都想我吧"那句時把聲好嬌!
  
其實果陣我時都幾憎周影,即係硬係覺得佢作作狀狀唔知想點咁囉,唔多唔少係受佢首〔Go Go Away Boy〕個MV影響既,MV中的Shadow Chow一面唱"Go Go Away Boy! Go on!"一面整埋d懶野性的表情,仲fing埋頭,咁我一路睇就一路"妖",hahaha....
  
講開〔情路茫茫〕,首歌幾好聽架,不過周小姐唱得唔好聽囉我覺得,即係佢d發音係:站立在 '賓' '煎' 方向 '叮' 路上,明明冇"n" 音又整d "n" 音落去,唔知佢故意定唔慣唱廣東話啦,不過周小姐好似冇第三隻碟出......
 

Anonymous said...

其實我都幾鐘意聽周影既﹐好似“情路茫茫”同埋“還仍然想我嗎﹖﹖”呢兩首主打﹐當初都無乜點留意﹐諗唔到十幾年後“還仍然想我嗎﹖﹖”呢隻碟出左復刻先開始留意返佢。

我仲記得大概92年度佢同李浩林係Channel V做一個叫做“音樂橋頭堡”既節目﹐聽講其表現都唔錯~~

另外﹐我睇完呢篇blog同埋呢篇文既comment﹐我真係好想睇“還仍然想我嗎﹖”既MV﹐唔知樓主或者其他讀者有無呢﹖﹖