新時代廣告 (8)


這是1988年1月《新時代》的廣告,《嫻情》勢如破竹,名符其實是冠軍大碟,一洗《變變變》的頹風。細看下方的蚊型字,陳慧嫻有份監製,都幾巴閉,兼負責封套概念,講真看不出有何概念,只知拍攝地點是中文大學百萬大道,另一個造型挽著藤篋,可能概念是預告她暫別樂壇,搭夜機去美國讀大學吧。

傻女傻足廿年,時間證明,這是慧嫻的代表作中的代表作,甚至發展到人如其歌。她自己在2003年重唱過 (《傻女的新衣》),容祖兒翻唱過,衛詩變過跳舞版,較少人記得的還有王靖雯 :



當徐小鳳也come back之後,坊間認為下一位最多人期待的殿堂級歌手是關正傑,但據聞他在美國養尊處優,已變成加大碼,不但不會再站上舞台,連肥姐碌盡人情卡請他做《友緣相聚》訪問也吃閉門羮。

1988年初的關正傑事業已到低潮,改編齊秦《大約在冬季》的《大約別離時》沒大迴響,廣告上寫「唯一廣東版」,當時的確是,1989年張國榮再次改編成《別話》,口碑也平平,無法超越原曲。《一個秋天》是關正傑最後一張大碟,他的淡出,標誌著香港樂壇唱得唔睇得的年代正式結束。


未有陳伶俐 (更未有李美鳳) 的林敏驄,填詞人突然想擠身幕前,中分頭、圓眼鏡,傻傻戇戇,他那時正和杜德偉主持《點解咁好笑》,搞笑形象初成,先扮深情唱《自你去後》,再小試牛刀唱跳舞歌《跳起》,聽眾完全唔受,直至1989年,他和曾志偉出《冇有線電台》,賣出20萬,唔扮才子做番無厘頭,他才第一次嘗到出碟的成功。


一碟歌手不少,但總會留下一丁點印象給流行樂迷,西歌又好,僻歌又好,但這位孟素伶,每次介紹她總說是孟海個妹,我睇得港產片少,誰是孟海也不知,孟素伶係乜歌路,唱過什麼歌,有什麼形象,什麼時候在電視出現過,真的一點頭緒也沒有。


《新時代》的非唱片廣告,洗米華和家姐賣洗面膏。以前睇《城巿故事》,覺得劉淑華塊面超大,洗面膏都要用多D。

3 comments:

m said...

關於孟小姐, 只知係藝視應該係發行代理, 但又唔係用藝視名出, 有一隻歌係黃耀光作曲, 而全隻碟係夕爺填, 曲風無乜特別~

http://mmlinx.blogspot.com/2006/04/blog-post_29.html
http://mmlinx.blogspot.com/2006/04/100th.html
http://mmlinx.blogspot.com/2006/05/blog-post_114667768357617318.html

講古佬 said...

原來林敏驄唱過歌......

劉淑華......唔講都真係唔記得......

Anonymous said...

孟素伶....我記得佢呀, 因為無論由佢個名以至佢個唱片設計都頗"特別"...

但佢唱過乜歌就真係只有佢先知la.

by 黑膠人