叱吒樂壇流行榜開榜 (第1周)


1988年3月27日,叱吒樂壇流行榜開榜,商台相當重視,區新明逢星期日早上9至12數榜,3粒鐘數足30首,CR1+CR2聯播,同時在星期日出書的《明報周刊》登榜單,榜單亦是投票表格。

前文321起飛講過,俞琤的理念是「a totally unbiased的流行榜,This is a chart that ends all charts」,叱吒榜伊始,即自封「全城最權威之流行榜」,口號是「專業推介‧樂迷投票」,現在有前半截,無後半截;榜內歌曲是「三十首商業一、二台及港台一、二台上週播放次數最多之歌曲」(新城因疑有廣告客戶買榜情況,不計在內),仲衰,現在只計903一個台。

回到20年前,第一周榜單如下 :

1988年3月27日 (week 1)
01. 半夢半醒 - 譚詠麟
02. 想妳 - 張國榮
03. 3/4日 – 夢劇院
04. 無伴的舞 – 甄楚倩
05. 暫停開始過 - 草蜢
06. 抹去界限線 - 麥潔雯
07. 深夜裡 - 林子祥
08. 酒店大堂 - 吳國敬
09. 塵緣 - 羅文
10. 只此一晚 - 甄妮
11. 假使真的可以 - 黃露儀
12. 永遠冬天 - 林志美
13. 迷城 - 風雲
14. 煙雨凄迷 - 陳百強
15. 攝石人 - 林志美
16. 昨夜夢魂中 - 張學友
17. Petula - Fundamental
18. 說不出的未來 - 夏韶聲
19. 神仙也移民 - 陳百強
20. 挑戰 - 黃敏華
21. 舊日的足跡 - Beyond
22. 纏綿歲月 - 李美欣
23. 今夜星光燦爛 - 達明一派
24. 天真的創傷 - Beyond
25. 結伴同航 - 林子祥
26. 不羈戀人 - 陳慧嫻
27. 飛躍千個夢 - 草蜢
28. 全人類高歌 - 太極
29. 赤紅熱血 - Beyond
30. 熱辣辣 - 張國榮

‧叱吒開榜第一首冠軍歌,原來是倫伯 (榜單托底的人頭就是他),《半夢半醒》年頭勁hit,年中才被《祝福》打低,拿不到叱吒至尊歌。
‧當時未有分餅仔,老老實實計數,因此出現有趣情形,如Beyond有3首上榜歌,張國榮、草蜢、林子祥、陳百強、林志美各有兩首。樂壇漸趨蓬勃,唱片公司愈來愈識打歌,這類情形慢慢減少。
‧榜單每星期登在《明周》最後幾頁粉紙之中,彩色full page,當落廣告,相當重本,登足整個88年,到了89年才停止。
‧稍後再數餘下榜單,下周邊個拿冠軍?不妨猜猜走勢 (其實是考記憶)。

21 comments:

小奧 said...

好似好多金曲,而家睇返都好勁。

Agnes Tse 艾麗絲謝 said...

後期搵埋樂評人, 不過都係讚多過彈.

商台仲有冇奉行唔播改篇歌既政策?

Sun Sun said...

"口號是「專業推介‧樂迷投票」,現在有前半截,無後半截..."

不如睇埋今個星期個榜同近年年終十大, 有幾多首歌同商台班友有關係, 你就知原來同商台有關係嘅人就夠專業得推介.

各有準則原本無可厚非, 只係唔該唔好下下走出嚟標榜自己最公平公正而又做唔到就得啦.

Fun said...

第二週應該係麟伯繼續坐正啦!《想你》好似上極都上唔到冠軍架~~

因為3月先開榜,所以胃癌既《傻女》已經播完,如果唔係隻歌響榜度一定好勁~

哇.. 《抹去界限線》,完全唔記得左呢首歌添,嗰陣好鍾意架喎真係~

當時派歌機制未成熟,成日呢個台播呢首,嗰個台播嗰首,咁會分散播放率~

Anonymous said...

應該是夢劇院的《四分三日》,Terry

ricky said...

勁 ! 1988 = 香港樂壇盛世。
1988年3月27日朝早我都有坐定定聽。記得應該係 9am - 11am CR1/CR2 先分開播, CR1果邊係利達英, 11am 後才join埋CR2區新明聯播。
叱吒榜 - 的確係果幾年每個星期日早上o既最佳精神食糧。
不過20年後的今天,已完全不是那回事了...

chi said...

ricky,

即是說,11-12是區新明、利達英一齊主持?區新明數榜的節奏感好勁,緊張刺激有娛樂性,又能顧及音樂內容,現在仍無人能及。

ricky said...

沒錯, 是在最後一個小時,兩個一起倒數第10位至第1位的。
他們除倒數之外,也會討論/分析那10首歌,和一些預先訪問歌星的片斷。
當然,他們兩個的canto pop知識非常豐富,感覺真的很pro,很公正,也就是當時點解"叱吒"咁多人buy既原因...(包括我)。
利達英在1988年已經是很有經驗的DJ(她大約是1985年入CR1的),加上因為之前CR1其實幾乎是一個99%全播中文歌的頻道(CR1早年已經有個[中文歌曲擂臺陣],based on唱片銷量的),直到321起飛為止。

Anonymous said...

話《祝福》打低《半夢半醒》,其實唔公平。因為半夢半醒大約係一月尾派台,二、三月於電台勁播;而呢個榜則於3月27日開榜(即係只計3月21日-3月26日既播放率),o個陣半夢半醒都係水尾啦,不見不散亦已派台。用三月尾才開始統計既播放率做標準來對兩首歌評分,唔公平。當然,《儍女》仲慘。要做"全城最權威之流行榜",年尾應該計埋1月1日至3月20日既播放率!

Anonymous said...

事實"祝福"點都應該係打低"半夢半醒" "傻女"
因為祝福我知道祝福上榜週數超越30星期..
之前叱吒公開叱吒頭10年100大播放率歌曲
88 最高5 首係 "祝福" "你好嗎?" "全人類高歌" "但願人長久" 美夢記心中"
不過如果叱吒早D 開榜既話, 半夢半醒應該排第二...傻女都應該有份

Anonymous said...

煙雨淒迷都好勁...到第二PLUG神仙也移民落榜佢先落...事實係好HIT

lauhohoi said...

有沒有人有完整清單,從1988年-1998呢?

謝謝

oilan said...

Beyond 都有3首上榜, 我好miss 5子時期的beyond, 4子更甚, 對3子感覺就退減了.

Anonymous said...

"叱咤"出現之前, CR2有個"金榜十大", 只計算CR2的播放率, 亦可說是"叱咤903專業推介" 的前身. 節目在星期六早上11-12出街, 由周美茵主持. 88年1月至3月19日12個星期共有8首冠軍歌: 沒有路人的都市, 第三者, 傻女, 灑脫, 每夜唱不停, 熱辣辣, 半夢半醒, 想妳. 其中譚校長的半夢半醒坐正三星期冠軍.

Old Ox said...

CR2

Old Ox said...

321起飛後, CR2星期一晚8至10有魏綺清的"流行曲直選", 節目口號係"我哋絕對尊重民意, 支持民意, 反映民意, 順應民意......". 星期一晚係"大碟榜直選", 倒數上一周香港的唱片銷量, 這是否CR1"中文歌曲擂台陣" 的延續? 其餘四晚有"自己友直選"(邀請另一名CR2DJ一同做節目),"名人歌手直選"同"二台擁躉直選"(邀請聽眾一同在CR2直播室主持節目, 倒後悔當年沒有給白兔仔寄信申請主持節目). 至於那晚是XX直選, 那直選佔兩晚, 記不起了.

Old Ox said...

當年叱咤節目的口號係 "每日, 我哋會監聽全港各主要電台, 統計中文歌曲嘅播放率, 訂定名次, 成為公正無私嘅叱咤樂壇流行榜".
最早期是CR1利達英, CR2區新明 於9至11,各自倒數第30至11位, 數榜期間又會公佈抽中獲得年終頒獎禮的幸運聽眾. 商業1台的節目JINGLE 同數榜時"第XX位"的聲帶, 播叱咤明演繹的版本, 相反CR2就播利達英的版本. 11時, 叱咤明會走到CR1直播室, 與利達英一同倒數叱咤10大, 回答聽眾問題, 繼續公佈幸運聽眾, 歌曲走勢分析, 以及倒數上周"樂迷投票"10大賽果. 唯一一次係第二期, 即88年"4月3日"(夢劇院"4分3日"應景奪冠那日), 兩台皆3小時全力倒數第一次"樂迷投票"30個名次的賽果, 倒數叱咤就草草了事!
後來, 記不起何時了, CR1,2不再聯播, 但仍各自在星期日早上9至12數榜, 繼而, CR1改播放時間至星期日下午, 所以有時會遷就賽馬直播, 提前一日在星期六下午數榜, 亦有因節目改動, 節目刪減到只得1小時, 只倒數叱咤10大! CR2就好一點, 然而節目調動, 數榜由9至12, 縮短至9至11, 但怎也會公佈30個名次, 當然亦試過係2小時或3小時節目, 與星期六或星期日節目!
至於"樂迷投票", 印象中1989年開始, 商台便沒有在"明周"刊登相關表格. 所有"投票"項目, 只在年終頒獎禮前數周, 同頒獎禮當日進行.

chi said...

Old Ox,

好詳盡的記憶資料,超讚。希望從你所寫知道更多商台的節目和DJ舊事。

Old Ox said...

CHI:

我找到那盒從前錄低CR2節目JINGLE聲帶. 88年3月27日, 321起飛的第1個星期日清晨, CR2(CR1也應相同)叱咤盤古初開的JINGLE應是這樣: 每日, 我哋會鑑聽全港各主要電台, 統計整個星期播放率最高嘅30首中文歌曲, 再經普羅樂迷投票, 選定名次, 成為公正無私嘅"叱咤樂壇流行榜". 至於上次那個......應係較後時期的JINGLE.

另外, 劉倩怡主持早上6-9的"坐看雲起時"主題曲係由林憶蓮演繹, 長達分幾鐘. CHI,你係憶蓮歌迷, 必定有印象. 可是那主題曲並無收錄在憶蓮的個人專輯內, 反而在年多後, 交由周美茵重唱, 正是那首"兩心知".

係呢, 何以無人講講CR2 321起飛後, 星期六,日的節目?

CHI, 你知不知憶蓮READY大碟, 一共有幾多首派台作品? 是否有6首? 上過叱咤的有4首:滴汗, 最佳男主角, 下雨天, 自製空間; TVB MTV出現過的還有2首: 命運是否這樣 同埋 黃昏!

另外, 你有無興趣寫篇文章講講'白板碟'?

chi said...

old ox,

唔好意思,之前外遊,跟住好忙,唔得閒覆你,你講呢個topic我好有興趣。
1. 你這餅盒帶超有價值,應該諗諗點樣與我們分享,過落電腦俾我地聽下好嗎?
2. 林憶蓮唱的《兩心知》,我未聽過兼唔知有,請你益下我呢個蓮迷啦。
3. TVB有拍過《黃昏》MV?真係完全未睇過,又要請你指點迷津。
4. 白板碟我沒有收藏,沒有資格講,請你詳談吧。

Old Ox said...

CHI:
我給你錄好盒88年3月21日CR2節目JINGLE聲帶, 係321起飛節目盤古初開的第一套JINGLE. 鑑於年代久遠, 恕難免音色欠佳. 另收錄89年秋軟硬節目片段, 當中當然不少得我至愛的'打電話問'(即係羅姑娘)環節(聽得笑到碌地). 細聽之下, 當時CR2的頻道係AM675, FM98.2及104.6,電話係385234, 電車收費是6毫, CR1剛出版'今日的聲音'大碟, 電視有個益力多廣告'左右左右左'...... 係呢,我怎樣寄給你? 你可用電郵信箱lts456@hotmail.com給我通知.