溏心菊英



趁住佢熱,做個關菊英專題先,寫blog好似做雜誌,都要講timing。

在我記憶中,第一次睇關菊英是《強人》(78年),兩大家族恩怨情仇,她做香家小姐,印象模糊了,大概說她被敵對雷家少爺 (黃允財?) 欺騙感情。

後來才知,由於她唱《狂潮》勁hit,被安排客串了一兩集,在石堅的酒店中登台演歌星,即是做番自己。《狂潮》咁經典人人都聽過,這首主題曲有個輕快版,比較少聽,歌詞也重寫成開心版,用來配合劇情播放,當年的長劇好認真。

關菊英 - 狂潮 (輕快版) (1976)
作曲 : 顧嘉煇 作詞 : 黃霑


跟住我有印象的是《儂本多情》(84年),她做商天娥的姑姐,其實是龜婆,介紹姪女做交際花;這個角色不簡單,攻於心計不是為了爭家產咁易明,而是為了在戰亂中的上流社會生存,最後商天娥設計報復,把姑姐置諸死地。我讀初中看這類電視劇,已覺得編劇高招,《溏心風暴》奸字寫在臉上未算扣人心弦。

關菊英最初唱很多幕後代唱,早期古裝劇呂有慧把聲都是她,譬如這套《西廂記》,夏雨就親自唱,所以秀琴和唐仁佳在30年前已合作過喇。

關菊英 + 夏雨 - 西廂一夢 (1976)


另外大熱的電視劇主題曲有《過客》(1981)、《天龍八部》的《兩忘煙水裡》(1982),唔使多介紹,以前台慶大回顧,就指定有呢啲歌。

關菊英 + 關正傑 - 兩忘煙水裡 (1982)
作曲 : 顧嘉輝 作詞 : 黃霑


我升中學後,已經對電視劇主題曲興趣不大,關菊英搣甩主題曲歌手路線,是在跳槽華星之後。

她82年嫁黎小田,那時八卦新聞不發達,也聽聞她被老公醉酒後毆打,傳聞無法求證,但她在84年離婚,之後竟然加入前夫主理的華星,還揼本幫她搞形象,改名關菊瑛 (現用回舊名),度身訂造離婚宣言歌《新的一頁》,相當震撼。

令我最震撼的,是她的新形象,華星的形象設計分兩條line,劉培基負責梅艷芳、羅文、新秀等,陳幼堅負責陳潔靈、關菊英,更加浮誇,陳潔靈變豹妹,關菊英則變了希臘女神,梳forward頭,穿破爛長裙,在韓國濟州島拍封面,拿著貝殼擺女神甫士,頸和手腳纏上金屬圈,唱片封面是貝殼,打開才見到關菊英,在一顆珍珠上,黑膠碟則用珍珠色膠,那時DJ還講笑內含珍珠末。

碟內還有發姣《火一般心思》,西歌一首,可惜搵唔番,邊個有請公諸同好。



關菊英 - 新的一頁 (1985)
作曲 : 趙文海 作詞 : 林振強


關菊英 - 一串問號 (1986)
作曲 : 隱者 作詞 : 小美
不知是否第一張碟仆,華星第二張碟回復basic,跟大潮流唱自傳式歌曲,但《一串問號》都唔hit。86年無線和IFPI有爭拗,IFPI旗下唱片公司如寶麗金、EMI等歌手不可上《勁歌金曲》做宣傳,華星歌手著數晒,《一串問號》入到季選,我在電視面前睇,聽到台下觀眾發出噓聲。



之後關菊英就移民加拿大了,間中才返來做煇黃,直至06年和拍拖多年的男友分手,回港定居做《靚聲演鬥廳》和拍劇,49歲事業創出第二春。

潮爆了,Djax還整了《講不出聲》remix,他以前整過阿梅、憶蓮、王菲,估唔到關菊英都變了dancing queen,如果有更多vocal部份仲正,可唔可以叫做《細契Mix》?

Master Djax X 溏心風暴 (2007)
http://web.mac.com/infrontcc/iWeb/djax/1.html

建議以下兩條片一齊play,可以變成更有震撼力的劇場版 :

關菊英 - 講不出聲 (2007)
作曲 : 鄧智偉 作詞 : 張美賢

21 comments:

Anonymous said...

一串問號,我以為好紅添。

不過佢果樣同風格冇變,唔知係咪懷舊八十的關係呢

Anonymous said...

欺騙感情的是何桂(貴?)林呀~

(香若楠好型! 不過朱江 -_-)
(呢套劇仲有林亦(當年寫'亦'架)華編劇)

Anonymous said...

在狂潮裡面, 關菊瑛仲同程一龍(石堅)有d 曖昧 (超忘年!) 劇情描寫程一龍老婆琴姐仲有d 妒忌佢.

記得94年? 放學返屋企屋林公子, 佢一次過播左過客同忘掉你像忘掉我. 曲式似到乜咁. 果次應該係我第一次聽'過客'

Anonymous said...

唔記得講埋, 黃允財並非雷家公字, 雷博文大哥是朱江, 雷學文細佬是發哥

Anonymous said...


狂潮輕快版好好聽:D
正喎

Fun said...

估唔到一齣"鮑魚風暴"可以咁勁,hit晒d甘草!聽聞細契響7月已經會去做美加巡迴添啦!

當年佢推出"新的一頁"既時候幾有noise架,好多宣傳,成套唱片封面既打歌服著上勁歌.. 我細個以為關菊英好大年紀,原來出"新的一頁"既時候先得27歲咋撞鬼,真係第二個蘇杏旋..

佢當年離婚之後,響86年農曆年開左第一次個唱,地點係新伊館!當時有個frd個uncle俾左4張免費飛我地(仲要係第一行)!不過當時關菊英唔係好夠hit歌,所以要唱好多其他人既歌,而狂潮仲要唱2次添~~ 仲由於我地坐第一行既關係,所以得到關菊英同鄭少秋(特別嘉賓)所派既1蚊利是.. 哈哈..

無錯,寫blog同寫雜誌一樣,打鐵要趁熱,我會盡快搞搞我自己個blog,大家密切留意啦!

Anonymous said...

老友,關菊英好像沒有remix?

chi said...

Kenny,

記憶中關小姐沒有remix,你覺得她最可以做remix的是哪首歌?

best actor said...

係啊﹐0個陣時關小姐宣傳《新的一頁》
時出0左白膠碟﹐跟Leslie0既《為你鍾
情》白膠碟打對台。為0左此白不同彼
白﹐記得關小姐上《婦女新姿》宣傳0既
時候﹐真係話過張唱片係有珍珠沫0既成
份﹐仲好cute 咁摸一摸塊面﹐真係硬銷
得厲害。估唔到佢果時只有27歲。可能
係黎小田的關係……仲記得佢演過劉華
版《神鵰》0既林朝英。當時已經係祖
師婆婆。

Anonymous said...

關菊英以前個形象好鬼成熟,好有"婦女feel",有小小趕客,不過近幾年佢復出,又覺得佢睇落幾後生幾索(尤其是同差唔多年紀的家燕姐DoDo姐比較起上來,哈哈)
佢好多年之前plug過一首快歌叫做<黑影>,係妖艷果種既(有扒地動作,同埋個化妝eyeshadow 好重手!),那時我同我auntie睇住個MV,初時仲以為係梅姐!

chi said...

順風耳,

我有《黑影》的MP3,這首歌是在《一串問號》中的,但記憶中未睇過MV。

我反而看過《火一般心思》MV,原來她在華星都是用野性快歌做第二主打,但全部唔hit。

Anonymous said...

我覺得如果要整remix,最好用番狂潮,貪佢夠經典,整street tracks 加 rap又好,整techno trance又好,反而無所謂,反正依家的DJ好有創意。

我記得當年有聽過宣傳話隻珍珠碟的珍珠末,能令大碟減少靜電噪音,我唔買黑膠的,所以無研究過真假。

Anonymous said...

黑影 mtv 在收費台播過...... 不過我都唔知首歌係乜 :p

Anonymous said...

Chi,真係好喜歡《狂潮》輕快版,
可唔可以畀MP3我?
都搵唔到呢隻歌響邊張碟,我諗就算搵到都幾難買到…

chi said...
This comment has been removed by the author.
Anonymous said...

Can you write about her in "Shall We Talk"? I am sure you can write much better than the rest and portray her from an angle no one has done before!

Anonymous said...

《火一般心思》&《黑影》MV我都有睇過,細契喺《火》MV入面好潮,著鴛鴦色絲襪(襪褲),一隻黑一隻白。
但係點睇《新的一頁》個封面都唔似喺濟洲島影,求其西貢一個石灘都有差不多效果啦!嘥料~~~
至於《狂潮》輕快版收錄喺《狂潮》「原聲大碟」,如冇記錯應該係娛樂唱片/文志唱片之類出版,封面係大浪撞擊岩石。

chi said...

To damon,

請下載 :
關菊英 - 狂潮 (輕快版)

Anonymous said...


好開心:D
謝謝您:D

Anonymous said...

溏心風暴英文歌--my love will get you home
MP3 Download and Video
http://www.utalk20.com/viewthread.php?tid=200&extra=page%3D1

Anonymous said...

可否再post 多一次關菊英 - 狂潮 (輕快版)

我找了很久