廿年人事幾番新

上文講到，1989年度新人競爭激烈，《勁歌》一個新人獎唔夠分，關淑怡王傑齊名「最」受歡迎，那時還未分男女組合金銀銅，真係爭崩頭。

大家都知無線air time幾矜貴，開頭那段每人唱幾句，好TVB風格，亦考驗晒班新人的實力，但沒一個入錯key甩拍子。我計過，全段3分鐘，總共15個單位，每人分到12秒。假如單計開口那幾句，最搶耳的是林楚麒，計埋觀眾緣當然是另一回事。

王傑其實不是新人，處男國語碟87年12月已在台灣推出，一出來就好老練，他在89年出了2張廣東大碟2張國語大碟，90年開紅館個唱，快過側田；關淑怡第一張唱片《冬戀》，其實未係好勁，年中出《難得有情人》，加埋索爆MV，才嘭一聲彈出，我記得這首歌原本收錄在雜錦碟，之後才收番在第二張LP，她一年內也出兩張碟，那時巿道多麼好。

王靖雯在89年走新鄧麗君溫婉路線，較慢熱，因此要靠關淑怡旁邊站；蘇永康也不算新，錄過不少單曲浸了幾年，離開華星才出生天；那時華星選擇捧譚耀文，貪佢似張國榮，兼跳得。文佩玲和譚耀文一樣是新秀冠軍，但成了華星棄將，過檔EMI才有碟出。

20年前出道的新人，2009年仍有唱歌的，剩下...關淑怡，聽講5月有新碟出；蘇永康舊年出了廣東國語碟各一，仍活躍；林保怡黐住劇先有得唱，《珠光寶氣》插曲《相戀兩個字》，他和黎姿合唱，唔知你有冇聽過；王傑應該仲有唱，喺大陸。

這些歌手今年都可以名正言順紀念出道20周年喇，會不會有搞作？

3分鐘出場序 :
王傑 - 可能
李健達 - 也許不易
王靖雯 - 無奈那天
文佩玲 - 浪子Jacky
譚耀文 - JoJo
蘇永康 - 失眠
麥偉豪 - 還是算了吧！
林楚麒 - 這就是愛
林保怡 - 彷彿一生
蔡齡齡 - 但願
仇雲峰 - 半真半假
彭家麗 - 獨行的白雲
鄭瑞芬 - 假裝‧假純情
Echo - 戰場
關淑怡 - 難得有情人

麥偉豪係最唔知做乜0既，細公司一碟歌手；李健達為人垢病的是條污糟頭巾，《阿郎的故事》首《也許不易》hit過下；蔡齡齡留給我們一首《細水長流》，播放royalty應該仲有得收；彭家麗有首17個字歌名的《是不是這樣的夜晚你才會這樣的想起我》，紀錄至今未被打破；鄭瑞芬我有她的《恋模樣新歌+精選》，我OK佢；Echo當然係好嘢，咁多動感快歌兼西歌，李蕙敏前年come back過，而家在哪裡呢？

RTHK十大中文金曲
最有前途新人獎
金獎 : 王傑
銀獎 : 關淑怡
銅獎 : 蘇永康
優異獎 : Echo / 黃翊 / 譚耀文

叱咤樂壇流行榜
叱咤樂壇生力軍男歌手
金獎 : 王傑
銀獎 : 蘇永康
銅獎 : 陳德彰
叱咤樂壇生力軍女歌手
金獎 : 關淑怡
銀獎 : 蔡齡齡
銅獎 : 王靖雯
叱咤樂壇生力軍組合
金獎 : Echo
銀獎 : 浮世繪
銅獎 : 風之Group