王靖雯的霸王追風洗頭水廣告


早在1992年,王菲已拍洗頭水廣告,早過霸王追風好多。清爽配方,中藥成份,人造雨兜頭淋,去頭屑防脫髮。


片段包括多個高難度動作,仰天搖頭fing水髮。


呵護baby,不澀眼睛。


還要擺出香車美人甫士,騷長腿,拍攝地點是本港名勝飛鵝山。


這個是《容易受傷的女人》MV,她最唔願唱的一首歌。每位歌手都有一兩首大hit但勁悶的歌曲,林憶蓮《愛上一個不回家的人》、彭羚《完全因你》、關淑怡《患難建真情》,視乎歌手自己點睇,有些搞個remix版、unplugged版、管弦樂版、rock版解悶,有些酬謝知音,唔鍾意都照唱,唯獨王菲最真性情,一句「d人話hit喎」,藐到出面,她94年演唱會後,有沒有唱過?

王靖雯 - 容易受傷的女人 (1992)
作曲 : 中島美雪 作詞 : 潘源良


首歌hit到呢,當年仲有套三級片,叫做《容易受溝的女人》

14 comments:

Leo said...

每位歌手都有一兩首大hit但勁悶的歌曲,林憶蓮《愛上一個不回家的人》(唔係好悶啫,意亂情迷版到家下都仲潮吖,呢曲台灣真係一百個hit,當年三歲小朋友都識倒轉唱)、彭羚《完全因你》(十個悶,歸功家嫂獨門慢版唱腔)、關淑怡《患難建真情》(我唔係好覺呢支hit過噃,悶唔悶就見仁見智喇,不過為關小姐長年守候嘅歌迷嗒落真係有感情架)

《容》又真係幾爛嘅,但係,霸王追風,唉,兩樣唔同嘅嘢,冇得比嘅,可?

i-Joel said...

最唔願唱?藐?王大姐可以由食飯去到食翅,還不是靠這首歌?這態度。。。用祖國北京最常用那句口頭禪:
我靠!!

篤篤篤撐 said...

呢首歌, 當年真係好HIT, 但王菲的地位卻不是單靠這首歌。
早在SHIRLEY ONCE MORE, 佢既"多得她"已經跑出, "容易受傷的女人"只不過是再下一城, 其段, 天后的地位, 應該是由菠蘿頭開始一步一步建立起來: 當時佢既風格, 就係同"客易受傷的女人"斬斷一切關係。

如果佢當年仲係繼續靠"容易受傷的女人"食老本, 睇怕佢都只不過是90年代眾多X花一現既女歌手既其中一個

Anonymous said...

"Shirley Once More"只係精選碟, "多得他"收錄在"You're The Only One"裡面, 不過不是主打, 只係在電台有口碑, 商台DJ拿來plug過下.

andrew said...

林憶蓮仲有一首大hit但勁悶的歌曲, 就係 《至少還有你》。其實想知蓮母對呢首歌印象如何?

ricky said...

>> 每位歌手都有一兩首大hit但勁悶的歌曲 …
仲有葉大姐的《瀟灑走一回》,嗰期(92年)一聽到個intro --> 好難頂!!

l said...

王:如果<多得他>算係已經跑出,咁<又繼續等>都可謂紅透半邊天;小弟都覺得唔算食老本,應該係忘本,不過某程度上<季候風>、<如風>以至<天與地>亦係老本變奏。
林:<愛上一個不回家的人>都算係異數,一開始已經玩咁盡(楊振龍 remix),之後 02 live 同 08 tour 依然有驚喜;<至少還有你>就真係冇得救,諗下最初根本揀唔落手就知佢鍾意極有限。
關:<患難建真情>真係唔算大 hit,反而<難得有情人>應該入圍:99 拉闊同 08 live 都有驚喜,不過最後 encore 都係要有親民大合唱...

Anonymous said...

若果無記錯,首歌Hit,應該同"大時代"有關?

wtk said...

由食飯去到食翅
邊有只靠一首歌咁易
無之後的努力
難有今日的王菲吧?
得一首one hit song的歌手很多
誰又可成功麻雀變鳳凰?
王菲鮮明而不模糊的態度應該係d人中意同討厭佢的原因之一

ricky said...

忘本?都唔算嘅,因為歌手自己的心態是很重要的。
佢唔願唱的話,再唱Live都唔會好聽啦!
除咗《容易受傷的女人》,其實佢應該都幾討厭當年自己嘅菠蘿頭同埋抄 Bjork image。

Anonymous said...

首歌大hit因為大時代藍潔瑛死時播了,我重記得當年畫面的震撼。由sell型變所謂入了屋,每個叫好的歌手變叫座的巨星都要靠一首這樣的歌及機會, 如囍帖街。這種小調歌曲,感覺幾土,但勝在旋律綿密易記,落在一些好手上偶然出現會變hit歌,如"容",飄雪,富士山下.. 不過最近有太多,又會好悶

麻鬼煩 said...

其實我想問樓主日日响度東家長西家短有咩目的?
好少男人會咁=.=

shangri_la said...

> 麻鬼煩 said...
>
> 其實我想問樓主日日响度東家長西家短有咩
> 目的? 好少男人會咁=.=

那麼你應該多謝樓主, 否則像你喜歡看東家長西家短的人就會少了一個地方去八

史丹利五 said...

回"麻鬼煩":

聞說呢個係阿Chi哥既專業, I mean 撈呢行。

佢無話你知咩?